Сайман Шустэр: Гэта яна. Зяленскі афіцыйна запусціў аперацыю M&Ms, каб паралізаваць маскоўскія аэрапорты
Украіна пачала аперацыю, якая павінна зрабіць расійскае неба настолькі небяспечным, каб замежныя авіякампаніі перасталі лётаць у Маскву. Журналіст The Atlantic Сайман Шустэр сцвярджае, што гэта і ёсць сакрэтны план M&Ms: масавыя налёты танных дронаў, разлічаныя на працяглае закрыццё аэрапортаў і ціск расійскай эліты на Пуціна.
Ілюстрацыйны здымак. Фота: vecteezy.com
2 верасня аўтар The Atlantic Сайман Шустэр паведаміў, што Уладзімір Зяленскі афіцыйна абвясціў пачатак аперацыі M&Ms, пра падрыхтоўку якой журналіст расказаў яшчэ ў жніўні.
«Зяленскі афіцыйна абвясціў пачатак аперацыі, вядомай як M&Ms, пра якую мы пісалі ў мінулым месяцы ў The Atlantic. Адна з крыніц, якая першапачаткова распавяла мне пра план, пацвердзіла сёння раніцай, што гэта менавіта яна», — напісаў Шустэр.
Сам Зяленскі кодавай назвы M&Ms публічна не ўжываў. Але 1 верасня ён заявіў, што Украіна рэзка павялічыць колькасць беспілотнікаў і ракет у расійскай паветранай прасторы.
«У расійскім небе проста будуць дроны ў такой колькасці, з якой давядзецца лічыцца», — сказаў ён.
Зяленскі асобна папярэдзіў замежныя авіякампаніі, страхавыя кампаніі і пасажыраў, якія працягваюць карыстацца паветранай прасторай і ключавымі аэрапортамі Расіі.
«Расійскае неба фактычна будзе закрывацца. Вайна, якую пачала Расія, закрывае яе неба», — заявіў ён.
Кіраўнік Украіны падкрэсліў, што гаворка не ідзе пра наўмысныя атакі на цывільныя самалёты. Мэта — стварыць такую пастаянную пагрозу вакол расійскіх аэрапортаў, каб іх працу даводзілася рэгулярна спыняць, а замежныя перавозчыкі самі адмовіліся ад палётаў.
Што такое аперацыя M&Ms
Праект быў упершыню падрабязна апісаны Шустэрам у The Atlantic у жніўні.
Назва M&Ms адсылае да мноства маленькіх, танных і амаль аднолькавых дронаў, неабходных для аперацыі. Паводле крыніц журналіста, Украіна разглядала магчымасць запускаць да тысячы беспілотнікаў за ноч, каб перагрузіць расійскую супрацьпаветраную абарону і надоўга закрыць аэрапорты Масквы.
Першапачаткова план прадугледжваў выкарыстанне аўтаномных дронаў са штучным інтэлектам. У іх памяць павінны былі загрузіць карты маршруту і выявы цэляў. Падчас палёту бартавая камера здымала б мясцовасць, а алгарытм параўноўваў убачанае з захаванымі выявамі і самастойна накіроўваў беспілотнік у цэль — без пацвярджэння ўдару чалавекам.
Гэта выклікала сур’ёзныя сумневы ў Зяленскага. Паводле The Atlantic, ён баяўся, што выпадковага трапляння ў пасажырскі самалёт або гібелі цывільных. Таму аўтары плана прапаноўвалі загадзя папярэджваць авіякампаніі, каб тыя выводзілі свае лайнеры з расійскіх аэрапортаў.
Разлік на незадаволенасць эліты
Мэтай аперацыі павінна было стаць не толькі парушэнне паветраных зносін. Яе аўтары спадзяваліся ізаляваць расійскіх чыноўнікаў, алігархаў і іншых заможных прыхільнікаў Пуціна ад замежных маршрутаў.
Праз заходнія санкцыі ў Маскву ўжо не лётаюць еўрапейскія і амерыканскія перавозчыкі, але застаюцца Turkish Airlines, Emirates і шэраг авіякампаній з Кітая, Турцыі і краін Персідскага заліва. Праз Стамбул і Дубай расійская эліта захоўвае зручны выхад у астатні свет.
Калі гэтыя кампаніі таксама спыняць рэйсы, разлічваюць аўтары M&Ms, уплывовыя расіяне могуць пачаць патрабаваць ад Пуціна вырашэння праблемы. У спалучэнні з іншымі эканамічнымі наступствамі вайны гэта павінна падштурхнуць Крэмль да перамоў.
Раней паведамлялася, што падрыхтоўка аперацыі спынілася ў ліпені пасля звальнення яе меркаванага аўтара — міністра абароны Міхаіла Фёдарава. Аднак цяпер Шустэр сцвярджае, што план усё ж быў адноўлены і афіцыйна запушчаны.
Пакуль не зразумела, ці будзе аперацыя рэалізаваная дакладна ў першапачатковым выглядзе. Але яе палітычная частка ўжо пачалася: Украіна афіцыйна папярэдзіла свет пра небяспеку палётаў у Расію і заявіла пра намер фактычна закрыць яе неба.