Хто той Мацвей з Наваполацка, якога ў Расіі асудзілі да 25 гадоў за падрыхтоўку тэракта
25‑гадовага Мацвея Кітава абвінавацілі ў супрацоўніцтве з украінскімі спецслужбамі і спробе падарваць ваенкамат у Новарасійску.
Мацвей Кітаў. Фота з ягонай старонкі Укантакце
Мацвей Кітаў нарадзіўся 13 лютага 2000 года ў Наваполацку. У родным горадзе ён скончыў політэхнічны каледж.
У 2023‑м годзе Кітаў выправіўся на працу ў Расію. Мяркуючы па тэлефонных кніжках і рэгістрацыях, хлопец працаваў там адміністратарам, кур'ерам у дастаўцы і менеджарам.
З паведамленняў у тэлеграм-чатах бачна, што Мацвей захапляўся азартнымі гульнямі. Ён пастаянна пісаў у чаты анлайн-букмекера 1win, дзе абмяркоўваў папаўненне балансу праз карты, спосабы адыграць бонусы, выпадзенне аўтаматаў, а таксама завісаў у камп'ютарных клубах і цікавіўся крыптапраектамі.
Паводле версіі расійскага следства, у снежні 2024 года ў Краснадары беларус праз інтэрнэт-месенджары пагадзіўся супрацоўнічаць з украінскай спецслужбай. Яму нібыта даручылі збіраць звесткі пра вайскоўцаў і караблі Чарнаморскага флоту, а пры канцы лютага 2025 года накіравалі падарваць самаробнай выбухоўкай пункт адбору на кантрактную службу ў Новарасійску. Кітаў забраў з тайніка пакет з 2,5 кілаграма выбухоўкі і перанёс у іншую схованку, пасля чаго яго схапілі расійскія сілавікі.
На судзе беларус цалкам прызнаў сваю віну і расказаў, што на выкананне гэтага задання быццам паспеў атрымаць ад куратара $805.
У выніку расійскі суд прысудзіў хлопцу ашаламляльны тэрмін: 25 гадоў пазбаўлення волі (з іх першыя пяць гадоў — у турме, а рэшту — у калоніі строгага рэжыму).