Chto toj Maćviej z Navapołacka, jakoha ŭ Rasii asudzili da 25 hadoŭ za padrychtoŭku terakta
25‑hadovaha Maćvieja Kitava abvinavacili ŭ supracoŭnictvie z ukrainskimi śpiecsłužbami i sprobie padarvać vajenkamat u Novarasijsku.
Maćviej Kitaŭ. Fota ź jahonaj staronki Ukantakcie
Maćviej Kitaŭ naradziŭsia 13 lutaha 2000 hoda ŭ Navapołacku. U rodnym horadzie jon skončyŭ politechničny kaledž.
U 2023‑m hodzie Kitaŭ vypraviŭsia na pracu ŭ Rasiju. Miarkujučy pa telefonnych knižkach i rehistracyjach, chłopiec pracavaŭ tam administrataram, kurjeram u dastaŭcy i mieniedžaram.
Z paviedamleńniaŭ u telehram-čatach bačna, što Maćviej zachaplaŭsia azartnymi hulniami. Jon pastajanna pisaŭ u čaty anłajn-bukmiekiera 1win, dzie abmiarkoŭvaŭ papaŭnieńnie bałansu praz karty, sposaby adyhrać bonusy, vypadzieńnie aŭtamataŭ, a taksama zavisaŭ u kampjutarnych kłubach i cikaviŭsia kryptaprajektami.
Pavodle viersii rasijskaha śledstva, u śniežni 2024 hoda ŭ Krasnadary biełarus praź internet-miesiendžary pahadziŭsia supracoŭničać z ukrainskaj śpiecsłužbaj. Jamu nibyta daručyli źbirać źviestki pra vajskoŭcaŭ i karabli Čarnamorskaha fłotu, a pry kancy lutaha 2025 hoda nakiravali padarvać samarobnaj vybuchoŭkaj punkt adboru na kantraktnuju słužbu ŭ Novarasijsku. Kitaŭ zabraŭ z tajnika pakiet z 2,5 kiłahrama vybuchoŭki i pieranios u inšuju schovanku, paśla čaho jaho schapili rasijskija siłaviki.
Na sudzie biełarus całkam pryznaŭ svaju vinu i raskazaŭ, što na vykanańnie hetaha zadańnia byccam paśpieŭ atrymać ad kuratara $805.
U vyniku rasijski sud prysudziŭ chłopcu ašałamlalny termin: 25 hadoŭ pazbaŭleńnia voli (ź ich pieršyja piać hadoŭ — u turmie, a reštu — u kałonii strohaha režymu).