Румынія ўхваліла распрацоўку буйнога радовішча магнію, каб выцесніць Кітай з еўрапейскага рынку
З Кітая паступае 97 працэнтаў магнію.
Румынія ўхваліла распрацоўку радовішча, якое змяшчае больш за 50 млн тон магнійзмяшчальнай пароды. Праект павінен знізіць залежнасць Еўропы ад паставак з Кітая, адкуль цяпер паступае каля 97% магнію, які выкарыстоўваецца ў ЕС, піша Bild.
Здабытую сыравіну плануюць перапрацоўваць у румынскім горадзе Сэліштэ, дзе хочуць вырабляць гідраксід магнію і высокачысты аксід магнію. Пазней праект могуць пашырыць да вытворчасці металічнага магнію.
Выканаўца праекта Mineral Proiect Invest SA ацэньвае неабходныя інвестыцыі прыкладна на €400 млн. Для транспартавання сыравіны кампанія плануе выкарыстоўваць канатную дарогу і электрычныя самазвалы, каб знізіць выкіды, шум і колькасць пылу.
Праект адпавядае стратэгіі ЕС у сферы крытычнай сыравіны: да 2030 года Еўрапейскі саюз хоча здабываць унутры блока не менш за 10% гадавой патрэбы ў стратэгічных рэсурсах і перапрацоўваць не менш за 40%.