У Нідэрландах адбыліся масавыя перабоі ў працы чыгункі праз прадметы на пуцях

У Нідэрландах у першай палове дня 15 верасня адбыліся маштабныя перабоі ў працы чыгункі. Праблемы закранулі паўночную і цэнтральную часткі краіны. Пра гэта паведаміла кампанія ProRail, якая кіруе чыгуначнай інфраструктурай.

Фота: EPA

На світанку, калі цягнікі павінны былі пачаць рух, прыкладна на 20‑ці ўчастках чыгуначных пуцей знайшлі трубы і кабелі. Сістэма маніторынгу ўспрыняла іх як перашкоды і перадала сігналы, што адпаведныя ўчасткі занятыя або непрыдатныя для руху цягнікоў.

У выніку рух цягнікоў прыпыняўся больш за 35 разоў. У ProRail адзначылі, што ў некаторых месцах пасля таго, як пабочныя прадметы прыбіралі з рэек, праз пэўны час там зноў знаходзілі іншыя перашкоды.

У кампаніі мяркуюць, што гаворка, верагодна, ідзе пра наўмысныя дзеянні, і не выключаюць сабатажу.

Пакуль ніхто не ўзяў на сябе адказнасць за інцыдэнты. Сваю датычнасць таксама адмаўляюць актывісты, якіх раней заўважалі ў розных здарэннях, звязаных з грамадскім транспартам, а таксама ў блакаванні руху.

Каментары да артыкула