Дачка Домрачавай і Б'ёрндалена выйграла гонку на лыжаролерах у Мінску
Ксенія на 13 секунд абагнала пераследніцу. Уся ў зорную маму.
Ксенія Б'ёрндален, 9‑гадовая дачка алімпійскіх чэмпіёнаў па біятлоне Дар'і Домрачавай і Уле-Эйнара Б'ёрндалена, стала пераможцай першага этапу сталічнага Кубка па лыжаролерах і кросе. Спаборніцтвы прайшлі на лыжаролернай трасе «Вяснянка» ў Мінску ў аўторак, піша Betnews.by
Ксенія Б'ёрндален прадстаўляла Цэнтральны раён Мінска і паказала найлепшы вынік сярод дзяўчат 2016‑2017 гадоў нараджэння.
Так, яна пераадолела дыстанцыю 1,4 км вольным стылем за 3 хвіліны 16,9 секунды. Усяго на старт у гэтай узроставай катэгорыі выйшлі 24 спартсменкі, але дзве не фінішавалі.
У тройку прызёраў таксама ўвайшлі Мар'яна Мацялёнак, якая прайграла Домрачавай-малодшай 13,5 секунды, і Эвеліна Шапіра, якая адстала ад лідаркі на 28,8 секунды.
Сталічны Кубак працягнецца 18 верасня індывідуальнай гонкай класічным стылем. Прычым стартавы пратакол другога этапу будзе сфарміраваны на аснове вынікаў першага этапу.