Мінчук знайшоў пашпарт, аддаў уладальніку, але стаў фігурантам крымінальнай справы
Што адбылося?
43‑гадовы мінчук са знаёмым праходзіў па падземным пераходзе станцыі метро «Трактарны завод». Паблізу прадуктовай крамы прыяцель убачыў на падлозе пашпарт, падняў яго і зайшоў у краму, каб спытаць, ці не ведае прадавец, каму належыць дакумент. Жанчына адказала адмоўна, пішуць Мінск-навіны.
Ён забраў знаходку, сказаўшы, што паспрабуе сам адшукаць уладальніка. Агледзеўшы яшчэ раз пашпарт, знайшоў пад вокладкай 185 рублёў і забраў сабе.
Пасля ён усё ж знайшоў уладальніка дакумента праз сацыяльныя сеткі і дамовіўся з ім аб сустрэчы. Па дарозе ён зняў з пашпарта вокладку і разам з медыцынскай выпіскай, талонам, візітоўкай і астатнімі 70 рублямі, якія ляжалі пад ёй, закапаў пад дрэвам. Мінчук спадзяваўся, што незнаёмец падзякуе яму, аднак той прыйшоў на сустрэчу з супрацоўнікамі міліцыі.
Першапачаткова мужчына сцвярджаў, што нібыта знайшоў дакумент ужо без вокладкі. Потым супрацоўнікі міліцыі ўсё ж высветлілі, куды дзеліся грошы пацярпелага.
Аказалася, мужчына, што згубіў пашпарт, у той дзень наведваў донарскі цэнтр і атрымаў грошы за здачу крыві. На зваротным шляху ён выпусціў пашпарт, але неўзабаве спахапіўся і вярнуўся ў падземны пераход. Потым зайшоў у краму. Прадавец распавяла, што ягоны дакумент знайшлі двое мужчын. Тады мужчына паведаміў пра здарэнне на лінію «102». Яшчэ праз час з ім на сувязь выйшаў і сам абвінавачаны.
У дачыненні да мінчука распачалі крымінальную справу.