Шасцігадовая дзяўчынка ледзь не патанула ў фантане ў Салігорску
У аўторак вечарам дзяўчынка гуляла з сяброўкай у раёне дзіцячага пляжу на беразе Салігорскага вадасховішча і спатыкнулася, зваліўшыся ў чашу фантана.
Выбрацца самастойна дзіця не змагло і стала сыходзіць пад ваду.
На шчасце, яе своечасова заўважыў матрос-выратавальнік мясцовай станцыі Таварыства выратавання на водах Міхаіл Далматовіч.
Ён пачуў крыкі аб дапамозе. Падбегшы да фантана на набярэжнай, выратавальнік убачыў на паверхні толькі галаву дзяўчынкі. Мужчына хутка зрэагаваў і выцягнуў пацярпелую на сушу.
— Яна ўся трэслася, была мокрая з ног да галавы. Я адвёў яе да сябе на пост, накрыў пледам, зрабіў кубак гарачай гарбаты і выклікаў хуткую дапамогу, бо яна сказала, што ў яе баліць ножка, — расказаў выратавальнік.
Аэрацыйныя фантаны на беразе Салігорскага вадасховішча ўсталявалі ў 2014 годзе падчас рэканструкцыі зоны адпачынку. Глыбіня гэтых канструкцый складае ад 0,8 да 1,3 метра.