Футбольная зорка Раберта Карлас страціў амаль усё, што зарабіў за кар'еру

Легендарны былы абаронца мадрыдскага «Рэала» і зборнай Бразіліі Раберта Карлас расказаў пра сур’ёзныя фінансавыя праблемы пасля завяршэння футбольнай кар’еры. Паводле яго слоў, ён страціў каля 99% грошай, якія зарабіў за дзесяцігоддзі ў прафесійным футболе, піша Marca.

Раберта Карлас. Фота: Wikimedia Commons

Раберта Карлас заявіў, што страты адбыліся праз праблемы, звязаныя з яго былымі агентамі і сямейнымі абставінамі. Ён прызнаўся, што дапусціў памылкі і цяпер заклікае маладых футбалістаў быць больш асцярожнымі з фінансамі і не паўтараць яго досвед.

Былы футбаліст адзначыў, што ў яго былі сур’ёзныя праблемы з адным з былых агентаў, а таксама вельмі складаная сямейная сітуацыя. Паводле яго слоў, аднойчы ў чацвер ён лёг спаць недзе апоўначы, а ўжо ў пятніцу атрымаў вялікую колькасць дакументаў, пра існаванне якіх раней нават не ведаў. Пасля гэтага ён страціў практычна ўсё, чаго дасягнуў за футбольную кар’еру.

Раберта Карлас завяршыў выступленні ў якасці гульца ў 2015 годзе. За сваю кар’еру ён гуляў за «Рэал», міланскі «Інтэр», «Фенербахчэ» і іншыя клубы. За зборную Бразіліі ён правёў 127 матчаў і забіў 11 галоў. Яго лічаць адным з найбольш вядомых левых абаронцаў у гісторыі футбола.

Каментары да артыкула