Кенія просіць прызнаць грамадзян краіны, якія трапілі ў палон ва Украіне, ахвярамі гандлю людзьмі
Вядома пра 354 грамадзян Кеніі на вайне ва Украіне. Прынамсі 84 з іх загінулі або прапалі без вестак.
Сваякі кенійцаў, якія далучыліся да расійскай арміі ва Украіне, трымаюць фотаздымкі сваіх блізкіх падчас акцыі ў Найробі. Яны заклікаюць урад тэрмінова вярнуць наc радзіму гэтых людзей і парэшткі загінулых. Фота: Andrew Kasuku / AP
Міністр замежных спраў Кеніі Мусалія Мудавадзі заклікаў прызнаць грамадзян краіны, якія трапілі ў палон ва Украіне, ахвярамі гандлю людзьмі, а не ваеннапалоннымі, паколькі іх «завербавалі пад ілжывым выглядам працаўладкавання», піша Бі-бі-сі.
Усяго ўраду Кеніі вядома пра 354 грамадзянаў краіны, якія былі ўцягнутыя ў вайну ва Украіне, паведаміў Мудавадзі ў чацвер парламенту. Прынамсі 84 з іх загінулі або прапалі без вестак. Пяць чалавек лічацца ваеннапалоннымі. Самаму маладому кенійскаму ваеннапалоннаму — 23 гады.
Ганаровы консул Кеніі ва Украіне наведаў лагер, дзе ўтрымліваюцца гэтыя людзі, і паведаміў пра гуманныя ўмовы ўтрымання.
«Абставіны іх вярбоўкі і падпісання кантрактаў адпавядаюць вызначэнню гандлю людзьмі», — цытуе Bloomberg Мудавадзі.
У лютым, пасля публікацыі справаздачы кенійскай разведкі пра тысячу грамадзян Кеніі, завербаваных Масквой для ўдзелу ў вайне, пасольства Расіі ў Найробі адхіліла абвінавачанні ў датычнасці да незаконнага набору кенійцаў на ваенную службу.
Паводле падлікаў Кіева, на баку Расіі ваююць больш за 28 тысяч замежнікаў са 135 краін, больш за 5 тысяч з іх загінулі. Ва ўкраінскі палон трапілі грамадзяне 51 краіны.
Зараз у палоне знаходзяцца прынамсі 213 замежнікаў, не лічачы грамадзян КНДР і Расіі. 37 з іх — грамадзяне афрыканскіх краін.