Kienija prosić pryznać hramadzian krainy, jakija trapili ŭ pałon va Ukrainie, achviarami handlu ludźmi
Viadoma pra 354 hramadzian Kienii na vajnie va Ukrainie. Prynamsi 84 ź ich zahinuli abo prapali bieź viestak.
Svajaki kienijcaŭ, jakija dałučylisia da rasijskaj armii va Ukrainie, trymajuć fotazdymki svaich blizkich padčas akcyi ŭ Najrobi. Jany zaklikajuć urad terminova viarnuć nac radzimu hetych ludziej i pareštki zahinułych. Fota: Andrew Kasuku / AP
Ministr zamiežnych spraŭ Kienii Musalija Mudavadzi zaklikaŭ pryznać hramadzian krainy, jakija trapili ŭ pałon va Ukrainie, achviarami handlu ludźmi, a nie vajennapałonnymi, pakolki ich «zavierbavali pad iłžyvym vyhladam pracaŭładkavańnia», piša Bi-bi-si.
Usiaho ŭradu Kienii viadoma pra 354 hramadzianaŭ krainy, jakija byli ŭciahnutyja ŭ vajnu va Ukrainie, paviedamiŭ Mudavadzi ŭ čaćvier parłamientu. Prynamsi 84 ź ich zahinuli abo prapali bieź viestak. Piać čałaviek ličacca vajennapałonnymi. Samamu maładomu kienijskamu vajennapałonnamu — 23 hady.
Hanarovy konsuł Kienii va Ukrainie naviedaŭ łahier, dzie ŭtrymlivajucca hetyja ludzi, i paviedamiŭ pra humannyja ŭmovy ŭtrymańnia.
«Abstaviny ich viarboŭki i padpisańnia kantraktaŭ adpaviadajuć vyznačeńniu handlu ludźmi», — cytuje Bloomberg Mudavadzi.
U lutym, paśla publikacyi spravazdačy kienijskaj raźviedki pra tysiaču hramadzian Kienii, zavierbavanych Maskvoj dla ŭdziełu ŭ vajnie, pasolstva Rasii ŭ Najrobi adchiliła abvinavačańni ŭ datyčnaści da niezakonnaha naboru kienijcaŭ na vajennuju słužbu.
Pavodle padlikaŭ Kijeva, na baku Rasii vajujuć bolš za 28 tysiač zamiežnikaŭ sa 135 krain, bolš za 5 tysiač ź ich zahinuli. Va ŭkrainski pałon trapili hramadzianie 51 krainy.
Zaraz u pałonie znachodziacca prynamsi 213 zamiežnikaŭ, nie ličačy hramadzian KNDR i Rasii. 37 ź ich — hramadzianie afrykanskich krain.