Беларуска набыла BMW у Маскве і папала на грошы — давялося даплаціць яшчэ $12 тысяч, каб ездзіць на аўто
Купля машыны ў расійскім аўтасалоне абярнулася для беларускі знаёмствам са скандальна вядомым расійскім аўтаблогерам Эрыкам Давыдычам і сур'ёзнымі праблемамі пры пастаноўцы аўто на ўлік.
Скрыншоты відэа: ютуб-канал Yardrey
Мара з сюрпрызам
Звычайна расіяне масава едуць па машыны ў Беларусь, а не наадварот, бо часы, калі беларусам было выгадна купляць машыны ў Расіі, даўно сышлі ў мінулае. Тым не менш беларуска Вольга набыла машыну ў падмаскоўных Хімках, бо менавіта там знайшлася BMW у выкананні і камплектацыі, аб якой марыла жанчына.
Такой машынай стала BMW 320 i M sport 2025 года выпуску, за якую беларуска заплаціла каля $73 тысяч.
Як жанчына расказвае ў сацсетках, яна ад самога пачатку папярэдзіла менеджараў аўтасалона «Рольф Прэміум» у Хімках, што яна — грамадзянка Беларусі, купляць машыну будзе на беларускі пашпарт, а ставіць на ўлік плануе ў Мінску. На што ў салоне ёй паведамілі, што праблем у Беларусі не ўзнікне, бо абедзве краіны ўваходзяць у Мытны саюз.
Дзяўчына забрала машыну, паспела абцягнуць яе ахоўнай браняплёнкай і паехала ў Мінск. Але радасць была нядоўгай.
У Беларусі Вользе адмовілі ў пастаноўцы на ўлік і запатрабавалі даплаціць каля $12 000 утылізацыйнага збору. Высветлілася, што аўтамабіль увозіўся на тэрыторыю ЕАЭС праз Кыргызстан па заніжаным інвойсе.
Згодна з дакументамі, BMW, якую прадалі ў Расіі за $73 тысячы, пры імпарце ў Кыргызстан для мытні нібыта каштавала ўсяго 16 600 еўра. Беларуская мытня ў такі смешную цану для BMW 2025 года не паверыла, ацаніла рэальны кошт аўто і выставіла Вользе рахунак на суму, якая была сэканомленая пастаўшчыком пры ўвозе аўто на тэрыторыю ЕАЭС.
Ілюстрацыйны здымак. Фота: «Наша Ніва»
Чаму такое адбылося?
Рэч у тым, што яшчэ з 1 ліпеня 2024 года ў Беларусі пачалі па-новаму налічваць утыльзбор на аўто, якія ўвозяцца з краін ЕАЭС — Расіі, Казахстана, Арменіі і Кыргызстана.
Калі з моманту размытнёўкі транспартнага сродку ў адной з краін ЕАЭС прайшло менш за год (а з ліпеня 2026 года адлічваюць два гады), беларускія мытныя органы пры налічэнні ўтылізацыйнага збору абапіраюцца на экспертную ацэнку кошту транспартнага сродку.
У выпадку, калі мытны кошт аўто, заяўлены пры мытным афармленні ў адной з краін ЕАЭС, будзе меншы за кошт, названы ў заключэнні аб незалежнай ацэнцы, то да стаўкі ўтылізацыйнага збору дадаецца розніца паміж мытнымі пошлінамі і падаткамі.
Суму даплат вылічваюць сыходзячы з той сумы, якую трэба было б аплаціць, калі б гэты аўтамабіль ад пачатку размытніваўся ў Беларусі з улікам экспертнай ацэнкі кошту (яна абапіраецца на рынкавы кошт аналагічных тавараў у краінах набыцця).
Такім чынам мытныя органы змагаюцца са спробамі заплаціць зменшаныя мытныя пошліны. У выніку замест стандартнага ўтыльзбору памерам 625 рублёў (каля 210 даляраў) жанчыне налічылі каля $12 тысяч.
Шоу працягваецца
Калі жанчына апынулася ў такой сітуацыі, то звярнулася па юрыдычную дапамогу да вядомага расійскага юрыста-блогера Ярдрэя (Андрэя Падшывалава), кампанія якога мае філіял у Беларусі і ўжо неаднаразова займалася гучнымі справамі ў нашай краіне.
Скрыншот відэа: ютуб-канал Yardrey
Разам з ім яна прыехала на перамовы ў аўтасалон «Рольф», дзе трапілі на здымкі шоу «Рольф-кантроль», якое вядзе скандальна вядомы аўтаблогер Эрык Давыдыч.
Асноўная пазіцыя «Рольфа» і Давыдыча ў тым, што машына прадавалася для эксплуатацыі ў Расіі, дзе яе на той момант спакойна паставілі б на ўлік, а правяраць тонкасці беларускага заканадаўства аўтасалон не абавязаны.
Праўда, у нейкі момант у бакоў амаль атрымалася дамовіцца. Першапачаткова Давыдыч прапаноўваў беларусцы вярнуць машыну ў салон, а ёй выплацілі б назад усю суму, або абмяняць BMW на нейкі іншы аўтамабіль з тых, што ёсць у продажу.
Такі варыянт не задаволіў беларуску, бо яна ўжо вытраціла месяц і купу нерваў на гэтае аўто, патраціла грошы на аклейку яго ў браняплёнку, а таксама панесла іншыя выдаткі. Апроч таго, сам аўтамабіль яе цалкам задавольваў, бо ён быў менавіта ў тым выкананні, якога яна хацела.
Менавіта праз гэта беларуска і набыла яго не ў Беларусі, а ў Расіі, бо іншых такіх нідзе не было.
Скрыншот відэа: ютуб-канал Yardrey
Пазней, праўда, «Рольф» ужо быў гатовы не толькі выкупіць назад аўто, але і даставіць яго з Мінска ў Маскву і пакрыць выдаткі на аклейку браняплёнкай. Але дамовіцца не атрымалася, бо, з аднаго боку, Вольга ўсё ж хацела застацца з гэтай BMW, а з іншага, па вяртанні да перамоваў змянілася пазіцыя Давыдыча, які выступаў з боку аўтасалона.
Што далей?
Паводле інфармацыі Ярдрэя, Вольга ўсё ж заплаціла суму, якую запатрабавалі ад яе ў Беларусі, каб паставіць аўто на ўлік.
Далей яна будзе падаваць у суд на прадаўца, каб той кампенсаваў даплату ўтыльзбору, які яна была вымушана даплаціць праз тое, што машына была ўвезеная ў ЕАЭС і размытненая па значна заніжаным кошце.
Вольга пойдзе ў беларускі суд.
Кыргызстан у гісторыі аўто з'явіўся не выпадкова
Адметна, што для Кыргызстана размытнёўка аўто па яўна заніжаным кошце — справа руцінная.
Шэрыя імпарцёры пры афармленні праз Кыргызстан могуць заніжаць рэальны кошт аўтамабіля нават у 3—4 разы.
Ілюстрацыйны здымак. Фота: «Наша Ніва»
Менавіта па гэтай прычыне размытнёўка дарагіх аўто ва ўзросце да трох гадоў праз Кыргызстан была нават больш выгаднай, чым 50%-ны дысконт для інвалідаў і шматдзетных пры афармленні па 140‑м указе ў Беларусі.
Для прыкладу, калі пры афармленні аўтамабіля коштам 100 тысяч еўра ва ўзросце да трох гадоў ільготная размытнёўка ў Беларусі абыходзілася ў 24 тысячы еўра, то ў Кыргызстане можна было ўкласціся ў 12—15 тысяч еўра.
Праз гэта менавіта Кыргызстан стаў асноўным пастаўшчыком дарагіх машын у Расію. Праўда, праблемы ў пакупнікоў такіх машын могуць быць не толькі ў Беларусі. Расійская мытня мае права праводзіць камеральную праверку цягам трох гадоў пасля мытнага афармлення. Таму той факт, што машына, размытненая праз Кыргызстан, сёння была пастаўлена на ўлік у Расіі, — не гарантыя таго, што ўласнік не сутыкнецца з праблемамі і адпаведнымі даплатамі ў будучыні. У Беларусі ж гэтыя праблемы яшчэ з лета 2024 года вылазяць адразу пры першаснай рэгістрацыі аўто ў краіне.