У Мінску пабудуюць два новыя пуцеправоды
Мост праз Чыжоўскае вадасховішча стане працягам вуліцы Малініна ў бок Лошыцы. Яшчэ адзін пуцеправод плануюць пабудаваць у раёне вуліц Сярова і Паўла Шпілеўскага.
Пра планы расказаў дырэктар «Гардарбуда» Сяргей Панёў «Мінск-Навінам».
Пуцеправод у раёне вуліц Сярова і Паўла Шпілеўскага пройдзе праз чыгунку. Праект прадугледжвае вывад паўднёвай магістралі праз вуліцу Асаналіева і будаўніцтва паўнавартаснага скрыжавання. Таксама давядзецца перабудаваць пад’езды да прамысловай зоны, дзе знаходзяцца «Рыбакомплекс», «Керамін» і камбінат «Клеон».
Мост праз Чыжоўскае вадасховішча дазволіць працягнуць вуліцу Малініна ў бок Лошыцы.
Асобныя планы датычацца «Паўночнага берага». Вуліцу Шырокую хочуць працягнуць ад Зялёнага Луга да новага мікрараёна. Спачатку плануюць пачаць праектаванне, а затым — будаўніцтва.
Акрамя таго, разглядаецца магчымасць праектавання і будаўніцтва дзвюх развязак на МКАД — у працяг вуліц Карастаянавай і Нававіленскай.
Дакладных тэрмінаў будаўніцтва не называюць.