Беларускія рэпетытары засталіся яшчэ без аднаго зручнага анлайн-інструмента — Miro адключае карыстальнікаў з Беларусі
Не паспелі беларускія выкладчыкі адысці ад шоку праз страчаныя пасля атак на дата-цэнтры «Яндэкса» даныя, як новая бяда.
Фота носіць ілюстрацыйны характар. Крыніца: «Настаўніцкая газета»
Як стала вядома «Нашай Ніве», беларускія рэпетытары цяпер атрымліваюць лісты ад замежнага сэрвісу Miro (гэта такая бясконцая анлайн-дошка, дзе выкладчык можа размяшчаць малюнкі, тэсты, схемы, практыкаванні, табліцы — і адначасова з вучнем працаваць над усім гэтым). Карані ў бізнэса расійскія, але зараз ён зарэгістраваны ў ЗША.
Кампанія папярэдзіла карыстальнікаў, што з 15 кастрычніка Miro пашырае спіс краін, дзе будзе дзейнічаць блакаванне па IP-адрасу — сэрвіс будзе недасяжным з тэрыторыі Беларусі і Расіі.
У жніўні 2024 года Miro ужо абвяшчала аб спыненні абслугоўвання акаўнтаў з Беларусі і Расіі. Але ўжо ў верасні ўдакладніла, што бясплатныя акаўнты змогуць працягнуць працу — пад абмежаванні трапілі толькі платныя падпіскі.
Цяпер жа палітыка кампаніі становіцца больш строгай. Тлумачыцца гэта санкцыйнымі рызыкамі.
Па ацэнках суразмоўцаў «Нашай Нівы», у Беларусі Miro карысталіся каля 70% анлайн-рэпетытараў. Але ў гэтым выпадку яны не страчваюць аптымізму і кажуць, што ўсё роўна працягнуць карыстацца Miro, але праз VPN.
Чытайце таксама:
У Беларусі перастаў працаваць яшчэ адзін сэрвіс «Яндэкса»
«Яндэкс Таксі» прыпыніў падключэнне новых перавозчыкаў у Беларусі
Украінскія дроны атакавалі буйны дата-цэнтр Сбербанка ў Саратаўскай вобласці