Новая расійская ракета «Філін»: чым яна небяспечная і як можа замяніць шахеды

Галоўнае ўпраўленне разведкі Міністэрства абароны Украіны паведамляе, што Расія напрыканцы лета гэтага года пачала прымяняць новую крылатую ракету «Філін». Гэта новая мадыфікацыя дронаў папярэдніх пакаленняў, якія запускаюць як БПЛА з зямлі (а не з самалётаў) і якія маюць меншую баявую частку, чым класічныя крылатыя ракеты, піша Украінская служба Бі-бі-сі.

Скрыншот з допісу ГУР

Цяпер гэтыя новыя ракета-дроны змогуць яшчэ далей даставаць тылавыя рэгіёны краіны, бо заяўленая дальнасць палёту «Філіна» — 1200 кіламетраў, у той час як цяперашнія рэактыўныя шахеды ў розных мадыфікацыях ляцяць значна менш.

Па даных ГУР, ракету распрацавала ААТ «НВА «Маланка», што ўваходзіць у склад карпарацыі «Тактычнае ракетнае ўзбраенне». У разведцы адзначаюць, што «Філін» — гэта працяг тэндэнцыі расійскага ВПК да стварэння адносна недарагіх сродкаў паветранага нападу з рэактыўнай цягай і наземным запускам.

Па інфармацыі ведамства, ракета мае кампазітны фюзеляж з вугле– і шклапластыку даўжынёй 3,5 метра і размахам крылаў 3 метры. Частку элементаў вырабляюць з дапамогай 3D-друку.

Заяўленая максімальная хуткасць «Філіна» — да 800 км/г, далёкасць палёту — да 1200 км. Ракета можа дзейнічаць як на самых нізкіх вышынях, так і на вышыні да 6 км. Існуюць мадыфікацыі з баявой часткай масай 50 і 100 кг. Звонку яна трохі нагадвае «Герань-5» апошняга пакалення на рэактыўным рухавіку, але ляціць значна павольней.

Пуск ракеты ажыццяўляюць з наземнай устаноўкі з дапамогай парахавога паскаральніка. У ГУР таксама высветлілі, што бартавое абсталяванне для «Філіна» вырабляе расійская кампанія ТАА «ПЛАЗ», якая бярэ ўдзел у вытворчасці беспілотнікаў «Гарпія». Па даных разведкі, блокі абодвух вырабаў маюць падобную кампаноўку і маркіроўку.

Навядзенне ракеты на цэль забяспечваюць інерцыяльная навігацыйная сістэма кітайскай вытворчасці і 16‑канальная сістэма «Камета». У той жа час аналіз элементнай базы паказаў павелічэнне долі кітайскіх кампанентаў у параўнанні з іншымі расійскімі ракетамі і беспілотнікамі.

Як адзначаюць у ГУР, рухавік «Філіна» — расійскі. Гаворка ідзе пра R500 вытворчасці ТАА «Рэйнальдс». Аналагічны рухавік раней ідэнтыфікавалі ў крылатых авіяцыйных ракетах С-71К «Кавёр» і С-71М «Манахром».

Новая пагроза замест шахедаў

Напярэдадні міністр абароны Украіны Яўген Хмара заяўляў, што Мінабароны працуе над забеспячэннем дронамі-перахопнікамі, авіяцыяй і боепрыпасамі да яе, зенітнымі ракетнымі і артылерыйскімі комплексамі, турэлямі, сродкамі РЭБ і іншымі рашэннямі для супрацьпаветранай абароны Украіны.

«Мы таксама ведаем, якія рашэнні Расія развівае, гэта тычыцца рэактыўных дронаў з хуткасцю 800 км. Працуем і над пошукам супрацьдзеяння наступнаму пакаленню пагроз. Адпаведныя задачы — падаць прапановы і прататыпы — пастаўленыя вытворцам, АПК», — сказаў Хмара.

Па даных крыніц Бі-бі-сі ў Мінабароны, ён меў на ўвазе менавіта «Філіна». Ракеты, дрона-ракеты або баражавальныя боепрыпасы, якія павялічваюць сваю хуткасць да 800—900 км/г, становяцца яшчэ больш складанымі цэлямі для перахопнікаў, чым звыклыя шахеды і першыя пакаленні рэактыўных шахедаў.

Яўген Хмара таксама расказаў журналістам, што Украіна ўжо мае паспяховыя вынікі прымянення дронаў-перахопнікаў супраць рэактыўных беспілотнікаў.

«Адно з падраздзяленняў падчас баявога прымянення пяццю перахопнікамі («Барс») знішчыла пяць паветраных цэляў. То-бок выніковасць 100%», — сказаў міністр.

Па ягоных словах, адным з найбольш эфектыўных сродкаў барацьбы з рэактыўнымі беспілотнікамі застаецца авіяцыя.

Раней Бі-бі-сі пісала, што эра звыклых дронаў-перахопнікаў супроць шахедаў і першых пакаленняў рэактыўных шахедаў адыходзіць у мінулае, а са з'яўленнем новых мадыфікацый дрона-ракет з хуткасцю 800—900 патрэбныя новыя сродкі іх збівання. Для гэтага патрэбныя будуць хуткасныя перахопнікі з рэактыўнымі рухавікамі, якіх ва Украіне не стае.

Каментары да артыкула