Былую рэзідэнцыю Гітлера «Арлінае гняздо» адновяць пасля пажару
Да ўзгарання гэта месца ў гарах — цяпер там працуе рэстаран — штогод наведвалі каля 300 тысяч чалавек.
Кельштайнхаўс. Фота: Wolfgang Manousek / Flickr / commons.wikimedia.org
У Баварыі маюць намер аднавіць Кельштайнхаўс — гістарычны будынак, вядомы як «чайны домік Гітлера», які днямі сур'ёзна пацярпеў ад пажару. Улады заявілі, што аб'ект быў добра застрахаваны, аднак аднаўленне патрабуе часу, піша Bild.
Пажар успыхнуў у пятніцу ўвечары. З-за снегу, лёду і едкага дыму пажарным давялося працаваць у вельмі складаных умовах.
Міністр унутраных спраў Баварыі Ёахім Херман пацвердзіў намер аднавіць будынак. Кельштайнхаўс пабудавалі ў 1937—1938 гадах як прадстаўнічую рэзідэнцыю нацысцкага кіраўніцтва. Сам Адольф Гітлер бываў там рэдка. З 1952 года будынак працуе як рэстаран.
Па падазрэнні ў падпале затрымалі 33‑гадовага мужчыну. Яго спынілі на горнай дарозе непадалёк ад будынка ў ноч на суботу: матацыкліст ехаў без нумарнога знака і, па паведамленнях СМІ, спрабаваў схавацца. Мужчына жыве ў Берліне.
Следства правярае магчымыя матывы. Папярэдняе заключэнне эксперта паказвае на прыкметы верагоднага псіхічнага захворвання. Суд распарадзіўся часова змясціць падазраванага ў спецыялізаваную псіхіятрычную ўстанову. Пры гэтым паліцыя не выключае палітычны матыў, звязаны з гісторыяй будынка.