У продажы з’явілася пашыранае англамоўнае выданне кнігі Алеся Бяляцкага

У продажы з’явілася англамоўнае выданне кнігі лаўрэата Нобелеўскай прэміі міру Алеся Бяляцкага. Яно істотна пашырае кнігу, выдадзеную ў 2022 годзе: у новыя раздзелы ўвайшлі развагі аўтара пра арышт у 2021 годзе, суд у 2023-м, больш як чатыры гады за кратамі і вызваленне ў снежні 2025-га.

Дапаўненні, створаныя пры непасрэдным удзеле Бяляцкага, — гэта асабістае сведчанне пра жыццё ў папраўчай калоніі і спробы захаваць чалавечую годнасць ва ўмовах татальнага дзяржаўнага кантролю. Аўтар таксама расказвае пра атрыманне Нобелеўскай прэміі міру ў 2022 годзе, калі ён знаходзіўся за кратамі.

Асабістая гісторыя Бяляцкага разгортваецца на фоне найноўшай гісторыі Беларусі — краіны, дзе тысячы людзей зазналі пераслед за імкненне да свабоднага грамадства. Кніга прапануе чытачам рэдкі, асабісты погляд на беларускі супраціў і дзесяцігоддзі дысідэнцкай дзейнасці вачыма чалавека, які дапамагаў будаваць гэты рух і заплаціў за гэта высокую цану.

Для перадачы беларускіх імёнаў у кнізе выкарыстаная беларуская лацінка. Гэта дапамагае захаваць іх беларускую форму і знаёміць англамоўных чытачоў з беларускай мовай і культурнай самабытнасцю.

Кніга можа стаць добрым падарункам для замежных сяброў і партнёраў: яна дапаможа ім лепш зразумець Беларусь і падзеі не толькі апошніх шасці гадоў, але і шырэйшы кантэкст апошніх пяцідзесяці гадоў.

Кнігу можна набыць на Allegro з дастаўкай па ўсёй Еўропе.

Каментары да артыкула