Забіты галоўнакамандуючы лівійскіх паўстанцаў: магчыма, сваімі ж, за здраду

Забілі яго па дарозе на допыт у паўстанцкай спецслужбе.

Пры таямнічых абставінах загінуў галоўнакамандуючы лівійскіх паўстанцаў. Ён быў у Кадафі міністрам унутраных спраў, але адных з першых перайшоў на бок паўстання. Забілі яго па дарозе на допыт, куды яго выклікалі па падазрэнні ў тым, што ягоная сям’я працягвае супрацоўнічаць з Муамарам Кадафі.

Пра гэта паведамляе сайт тэлеканала «Аль-Джазіра». Разам з Юнэсам загінулі і два ягоныя памочнікі.

Паведамленні з Бенгазі прыходзяць супярэчлівыя. Няясна, ці Абдэль Фатах Юнэс быў забіты да допыту, ці пасля яго

Юнэс кіраваў ваеннай кампаніяй паўстанцаў.

Старшыня пераходнай нацыянальнай рады (ПНР) Лівіі Мустафа Абдэль-Джаліль зачытаў заяву пра забойства Юнэса з паперкі. Паводле афіцыйнай версіі паўстанцаў, Юнэс быў забіты з агнястрэльнай зброі, трапіў у засаду.

Абдэль-Джаліль назваў версію, што галоўнакамандуючы быў застрэлены самімі паўстанцамі, «чуткамі, якія распаўсюджваюць прыхільнікі Кадафі».

Па словах Абдэль-Джаліля, аднаго з нападнікаў затрымалі, шукаюць іншых.

Абдэль-Джаліль назваў Юнэса героем рэвалюцыі.

Цікава, што адразу пасля прэс-канферэнцыіАбдэль-Джаліля каля гатэля «Тыбесты», дзе яна праводзілася, таксама выбухнула страляніна.

У сераду Юнэса адклікалі з фронту рашэннем ПНР для правядзення допыту, бо з’явіліся падазрэнні, што ён супрацоўнічае з Кадафі.

Меркавалі, што Юнэс адпраўляе ў Трыпалі зброю, якая трапляе ў рукі мяцежнікаў.

Тым часам паўстанцы распачалі чарговы наступ на захадзе Лівіі.

Каментары да артыкула