Sielanin, pałonieny i raździety ŭkrainskimi śpiecnazaŭcami, staŭ hierojem internetu, źjavilisia novyja videa ź im
Učora Ukraina była ŭ šoku ad videa, kali zatrymanaha demanstranta aholenym zdymajuć bajcy adnoj ź siłavych struktur.
Paciarpiełym akazaŭsia dobraachvotnik z Čaćviortaj kazackaj sotni Samaabarony Michaił Haŭryluk. Jon sielanin z-pad Čarnaŭcoŭ, jaki pravioŭ na Majdanie ceły miesiac.
Na hetym fota jon siače drovy na Majdanie.
«Pšanicy 75 sotak pasiejaŭ, jana ŭzyšła tak družna, jak ćvički, zaraz da viasny mahu być u Kijevie. Paśla harodninu pasieju, i znoŭ nazad, — žartaŭliva raskazvaŭ jon žurnalistcy ŭ śniežni. — Što žonka moža skazać kazaku? Dzie treba narodu, tam i jon. A jana i bieź mianie narmalna žyvie, nie haładaje, pryzvyčaiłasia. Ja sam ź vioski, spačatku niekalki hadoŭ u horadzie mykaŭsia, potym znoŭ dadomu viarnuŭsia».
Kałarytny mužčyna ŭ kažusie i kažušanaj huculskaj šapcy, jon fihuravaŭ na šmatlikich zdymkach i videa z Majdanu.
Učora Ukraina była ŭ šoku ad videa z Haŭrylukom na marozie.
Urešcie milicyja jaho adpuściła. Mužčynie akazana miedycynskaja dapamoha.
Nasupierak čakańniam aŭtaraŭ videa, Haŭryluk staŭ novym simvałam Majdanu: «Jon navat u pałonie vioŭ siabie jak kazak, nie schiliŭsia», — pišuć u internecie.
Ministerstva ŭnutranych spravaŭ pryznała fakty, vyjaŭlenyja na videa, i pryniesła aficyjnyja prabačeńni.
* * *
«Bierkutaviec» z Chiersona, jaki vystaviŭ videa z aholenym demanstrantam: «Ukraina dla russkich!»