U Minsku startuje Miesiac polskaj litaratury
U centry Minsku, u mastackim kłastary «Halerei Ŭ» (vystavačnaj zali, bary i kniharni), raz na tydzień buduć adbyvacca litaraturnyja, muzyčnyja i teatralizavanyja imprezy z udziełam paetaŭ, muzykaŭ i aktoraŭ z Polščy i Biełarusi.
Raskład imprezaŭ:
29 kastryčnika (čaćvier) – «Dzień usich žyvych»
Paśla ŭračystaha adkryćcia «Miesiaca», na jakim vystupiać hanarovyja hości, adbudziecca prezientacyja knihi vybitnaj paetki Evy Lipskaj «Dzień usich žyvych», jakaja vyjšła ŭ pierakładzie Andreja Chadanoviča. Muzyčnaje azdableńnie - akardeanist Anatol Taran. Z udziełam aŭtarki.
Halereja Ŭ (Niezaležnaści, 37a). Pačatak a 19-00. Uvachod – volny
Eva Lipska – mocny hołas z pakaleńnia «Polskaj novaj chvali», pakaleńnia, dla jakoha punktam adliku stali dramatyčnyja ŭschodniajeŭrapiejskija padziei 1968 hoda. Z tych časoŭ vydała kolki paetyčnych zbornikaŭ, a pierakłady jaje knih vyjšli ŭ mnohich krainach śvietu. U «Dzień Usich Žyvych» uvajšli vybranyja vieršy. Kniha składajecca ź dźviuch častak. U pieršaj sabranyja najlepšyja vierlibry z usich paetyčnych zbornikaŭ aŭtarki. U druhoj častcy całkam pradstaŭlenyja vieršy prozaj z apošnich knih paetki: «Lubaja pani Šubiert…» i «Kachańnie, lubaja pani Šubiert…»
5 listapada (čaćvier) – «Pačytaj mnie komiks!»
Prezientacyja-dyskusija z udziełam polskich i biełaruskich komiksarobaŭ i vydaŭcoŭ: Tomaša Samojlika i Adama Hłobusa, a taksama Paŭła Adamiaka i Źmitra Višniova. Prezientacyja pierakładu polskaha komiksa «Bortnik Ihnat i skarb puščy». Viadučaja – art-krytyk, redaktarka almanacha «pARTisan» Taćciana Arcimovič.
Halereja Ŭ (Niezaležnaści, 37a). Pačatak a 19-00. Uvachod – volny
Pra komiks «Bortnik Ihnat i skarb puščy». Treci padzieł Rečy Paspalitaj. Razam sa źniknieńniem dziaržavy pad pahrozaj akazalisia puščy, što trapili pad uładu rasijskaj impieryi, u tym liku - Biełaviežskaja. Hieroj komiksa, bortnik Ihnat, žyvie ŭ staroj čascy puščy i zajmajecca dzikimi pčołami. Daviedaŭšysia pra płanavanuju vyrubku i źniščeńnie puščy, Ihnat ustupaje ŭ zmahańnie za svoj dom. Avanturnaja fabuła komiksa spałučaje histaryčnyja elemienty z vymyślennymi. Komiks napisany prostaj movaju. Nasyčany humaram, azdobleny jarkimi ilustracyjami i kałarytnymi piersanažami. A taja akaličnaść, što dziejańnie razhortvajecca na terytoryjach sučasnych Polščy, Biełarusi, Litvy, i Ŭkrainy robić jaho pryvabnym nie tolki dla polskich čytačoŭ, i nie tolki dla dzietak.
Tomaš Samojlik – navukoviec, supracoŭnik Instytuta daśledavańnia sysunoŭ Polskaj akademii navuk u Biełaviežy, prafiesijna zajmajecca daśledavańniem naturalnaj historyi Biełaviežskaj puščy. Akramia taho piša knihi dla darosłych i dziaciej, a taksama stvaraje komiksy, za što atrymaŭ šerah uznaharod i premijaŭ.
18 listapada (sierada) – «Zabojstva pa-polsku»
Teatralizavanaja prezientacyja ramana adnaho z samych viadomych polskich aŭtaraŭ detektyvu Zyhmunta Miłašeŭskaha «Dola praŭdy». Z udziełam aktoraŭ i pierakładčycy Maryny Kazłoŭskaj. Viadučy – Andrej Chadanovič.
«Dola praŭdy» – heta nie tolki intryhoŭny siužet, jaki kružlaje siarod malaŭničych dekaracyjaŭ halicyjskaha haradka i trymaje miortvym uchopam da apošniaj staronki. Hety raman - adlustavańnie žyćcia sučasnaj jeŭrapiejskaj krainy, hramadzianie jakoj sprabujuć vieści balučy, ale patrebny dyjałoh nakont svajho nie zaŭždy hładkaha i cichamirnaha minułaha. Dyjałoh, temami jakoha robiacca fašysckaja akupacyja, kamunistyčny režym, a taksama nacyjanalistyčnaja prapahanda.
Ŭ-bar (Niezaležnaści, 37a). Pačatak a 19. Uvachod - volny
26 listapada (čaćvier) – adkryćcio vystavy «Maładaja polskaja ilustracyja»
Ekspazicyja pakazvaje tvorčaść troch maładych polskich mastakoŭ, niadaŭnich vypusknikoŭ fakulteta hrafiki Varšaŭskaj Akademii mastactvaŭ - Ahaty Dudek, Moniki Chanulak i Małhažaty Novak. Na vystavie buduć pradstaŭleny ilustracyi, prajekty knih i knihi, jakija ŭžo možna nabyć u polskich kniharniach. Vystava budzie doŭžycca da 13 śniežnia. Halereja «Akademija» Biełaruskaj dziaržaŭnaj akademii mastactvaŭ (vuł. Surhanava, 14) Pačatak a 17-00. Uvachod volny
Taksama zaprašajem u kniharniu «łohvinaŬ», dzie na stałaj asnovie pracuje «Polskaja šafa» – vialikaja palica z knihami na polskaj i biełaruskaj movach. Sučasnyja i kłasičnyja, darosłyja i dziciačyja, detektyvy i fantastyka, – padychodź i nabyvaj, ci prosta čytaj.