Sieviaryniec pra vybary: Trup voraha nie prapłyvie pa race sam
Pavieł Sieviaryniec. Fota Iryny Arachoŭskaj, Belsat.eu.
Kali my chočam dabicca svabodnych vybaraŭ, masavyja pratesty patrebnyja na etapie farmiravańnia vybarčych kamisij, miarkuje Pavieł Sieviaryniec.
«Kali my moŭčki, cicha i niezaŭvažna ŭvachodzim u «vybarčy praces», pastka zachłopvajecca. Usio. Možacie trapiatacca dalej kolki zaŭhodna, skardzicca ŭ presie, što «našych, jak zaŭsiody, nie ŭklučyli», źviartacca da mižnarodnaj hramadskaści i navat bajkatavać. Mašyna złačynstvaŭ zapuščanaja, i złamać jaje, kali jana nabrała chadu, na paradak składaniej», — napisaŭ Pavieł Sieviaryniec u siabie ŭ fejsbuku.
43-hadovy chryścijanski demakrat Sieviaryniec zmahajecca za prava stać adzinym kandydatam ad demakratyčnaj apazicyi.
Kali jon pieramoža svaich kankurentaŭ u baraćbie za heta, jon maje namier skancentravać namahańni hramadstva na etapie farmiravańnia vybarčych kamisij.
Apazicyja prydumała składanuju schiemu abrańnia adzinaha kandydata
«Klučavy momant kampanii 2020 hoda — heta nie pačatak daterminovych falsifikacyjaŭ i navat nie asnoŭny dzień hałasavańnia. Klučavy momant — heta abviaščeńnie kampanii i pryznačeńnie «kamisijaŭ», jakija zajmajucca arhanizavanym machlarstvam, — piša lidar apazicyi. — Vychad na Płošču treba rabić nie tady, kali zładziejstva ŭžo adbyłosia. Treba vychodzić na pratest i patrabavać adstaŭki Jarmošynaj dy inšych falsifikataraŭ PRAZ NIEKALKI DZION paśla abviaščeńnia «vybaraŭ». Heta abaviazanyja rabić i prychilniki ŭdziełu, i prychilniki bajkotu — RAZAM», — padkreślivaje palityk vialikimi litarami.
Sieviaryniec taksama vypuściŭ krytyčnuju strału u bok tych, chto ŭchilajecca ad kankretnaj dziejnaści, abmiažoŭvajučysia ahulnaj krytykaj situacyi:
«Chtości piša, što patrebny udzieł da kanca. Chtości — što tolki Płošča. Chtości — što ihnor, i trup tvajho voraha prapłyvie pa race. Chtości — što bajkot z samaha pačatku, i tady režym ruchnie. Dy nie ruchnie jon sam pa sabie», — zaścierahaje Sieviaryniec.
Nahadajem, što za ŭdzieł da kanca vystupaje Andrej Dźmitryjeŭ i jaho kampanija «Havary praŭdu», jakija ŭ 2015 hodzie vystaŭlali ŭ jakaści kandydatki ŭ prezidenty Taćcianu Karatkievič. Jana nie zaklikała da masavych pratestaŭ na vulicach, aficyjnyja źviestki naličyli joj niekalki pracentaŭ hałasoŭ.
Za bajkot ad samaha pačatku vystupaje Zianon Paźniak, jaki z emihracyi kiruje Kansiervatyŭna-chryścijanskaj partyjaj BNF. Paźniak sabraŭ 13 % hałasoŭ na vybarach 1994 hoda, a ŭ 2001 i 2006 hadach sprabavaŭ sabrać 100 tysiač podpisaŭ, nieabchodnych dla rehistracyi kandydatam.
U pracedury abrańnia adzinaha kandydata ad apazicyi ŭdzielničajuć nacyjanalna-kansiervatyŭnyja Partyja BNF i Chryścijanskaja demakratyja, levyja Zialonyja, levacentrysckaja Hramada, libieralnaja Abjadnanaja hramadzianskaja partyja i nacyjanalna-libieralny Ruch za Svabodu dy šerah inšych hrupovak i inicyjatyŭ.
Apošni raz apazicyja abrała adzinaha kandydata ŭ 2006 hodzie. Tady vybary skončylisia Płoščaj, a biełaruskaja apazicyja zdoleła mabilizavać krainy Jeŭrasajuza na svaju padtrymku. Mienavita tady ŭźnikli prahramy dapamohi represavanym, stypiendyjalnyja prahramy dla studentaŭ, uźnik telekanał «Biełsat», a jeŭrapiejskija fondy pašyryli prahramy padtrymki biełaruskaj kultury, ŚMI i niezaležnych inicyjatyŭ.
Telehram-kanał «Puł pieršaha», blizki da pres-słužby Alaksandra Łukašenki vykazaŭ mierkavańnie, što «nie budzie ad apazicyi adzinaha kandydata na prezidenckich vybarach».
«Čamu nie budzie kandydata? Pierasvaracca, — pisaŭ kanał. — Šmat hadoŭ apazicyja nie moža damovicca miž saboj — i pryznać heta taksama nie moža». «Puł pieršaha» krytykavaŭ taksama damoŭlenaści ab prahramie adzinaha kandydata: «My b, prykładam, z zadavalnieńniem pačytali, što pravacentrysty źbirajucca rabić paśla realizacyi idei «vychadu z Sajuznaj dziaržavy».
Sieviaryniec zaklikaje apazicyju abjadnacca vakoł patrabavańnia svabodnych vybaraŭ.
«Režymu treba padzialić hramadstva na prychilnikaŭ udziełu i prychilnikaŭ bajkotu, i chaj vałtuziać adno adnaho, kab až pył kureŭ, — piša Sieviaryniec. — Ale ŭsie my chočam volnych, spraviadlivych i sapraŭdnych vybaraŭ».
Sieviaryniec prapanuje «masava padavać zajavy na ŭklučeńnie ŭ kamisii apazicyi i niezaležnych pradstaŭnikoŭ i rabić novuju chvalu pratestaŭ, kali im admoviać».