Dźmitryj Jaraš zaklikaŭ Ukrainu dapamahčy biełarusam stvaryć svajo vojska i vyzvalić Biełaruś
Były lidar «Pravaha siektara» vykazaŭ mierkavańnie, što «ŭ najbližejšaj pierśpiektyvie Ukraina abaviazanaja pravieści śpiecyjalnuju vajennuju apieracyju pa vyzvaleńni brackaj Biełarusi» ad režymu Łukašenki. Pra heta jon napisaŭ u Fejsbuku.
Dźmitryj Jaraš. Fota: dyastrub / Facebook
Pavodle Jaraša, Ukraina z dapamohaj sajuźnikaŭ pavinna akazać «usiu nieabchodnuju padtrymku biełaruskim patryjotam u stvareńni najnoŭšaha biełaruskaha vojska».
Meta, jakuju bačyć Jaraš, — vyzvaleńnie Biełarusi nie tolki ad režymu Łukašenki, ale i ad rasijskaj akupacyi. Paśla hetaha, pavodle jaho, Biełaruś zmoža dałučycca da budučaha Bałtyjska-Čarnamorskaha sajuza svabodnych narodaŭ.
«Słava biełaruskim voinam, jakija vajujuć za našu i ich svabodu!» — piša Jaraš.