Rasijskija ŚMI: U nas biełaruskuju kaŭbasu pradajuć, a dzie ŭ Minsku kramy ź sibirskimi praduktami?
U Novasibirsku dniami zapracavaŭ kirmaš biełaruskich praduktaŭ. Kala ŭvachodu — mabilny punkt dla pryjomu dobraachvotnikaŭ na vajnu.
Biełaruski kirmaš u Novasibirsku. Fota: Stas Sakałoŭ / Ngs.ru
Na kirmašy biełaruskich tavaraŭ vystaŭlena pradukcyja bolš čym 30 ajčynnych vytvorcaŭ roznaj nakiravanaści. Sibirskaje vydańnie Ngs.ru raspaviało, što ź siabie ŭjaŭlaje novy biełaruski kirmaš i jakija tam ceny.
Apovied pačynajecca z taho, što adrazu na ŭvachodzie (jaki źjaŭlajecca adzinym) kirmaš sustrakaje haściej scenaj, na jakoj vystupajuć tvorčyja kalektyvy, a taksama vialikim banieram z rekłamaj słužby ŭ rasijskaj armii i mabilnym vajskovym punktam dla pryjomu dobraachvotnikaŭ.
Adziny hałoŭny ŭvachod na biełaruski kirmaš ŭ Novasibirsku. Fota: Stas Sakałoŭ / Ngs.ru
Tyja ž, kaho ŭsio heta nie cikavić, mohuć adrazu prajści ŭ samu handlovuju zonu i panakuplać biełaruskaha tekstylu, adzieńnia, kaśmietyki, šakaładu, kaŭbas i syroŭ (adnak zusim niadaŭna Rasija vyrašyła ŭvieści zabaronu na ŭvoz biełaruskich syroŭ, jak jany akazalisia na kirmašy, nieviadoma).
Pry hetym vydańnie Ngs.ru adznačaje, što ŭ Novasibirsku i biez taho pracujuć bolš za 60 śpiecyjalizavanych biełaruskich mahazinaŭ, nie kažučy ŭžo pra toje, što pradukcyja ź Biełarusi tam rehularna sustrakajecca i ŭ zvyčajnych supiermarkietach.
Ažyjataž na kirmašy siarod miascovych pakupnikoŭ — na kandytarskija, syrnyja i kaŭbasnyja vyraby. Tam možna sustreć pradukcyju takich vytvorcaŭ, jak «Cpartak», «Babulin harłačyk», Hrodzienski miasakambinat i inš.
Ceny nastupnyja. Dobry biełaruski šakaład budzie kaštavać nie tańniej za 3 biełaruskija rubli za plitku. Ceny na syry pačynajucca z 22 rubloŭ za kiłahram, a bolšaja častka ź ich kaštuje daražej za 30. Zvyčajnaja varanaja kaŭbasa kaštuje niadoraha, adnak usia dalikatesnaja syravialenaja budzie kaštavać bolš za 50 rubloŭ za kiłahram.
Ceny biełaruskich syroŭ i kaŭbas (u rasijskich rublach) na kirmašy ŭ Novasibirsku. Fota: Stas Sakałoŭ / Ngs.ru
Atmaśfiera na biełaruskim kirmašy ŭ Novasibirsku. Fota: Stas Sakałoŭ / Ngs.ru
Adnak Ngs.ru taksama źviartaje ŭvahu na toj fakt, što bolšaja častka pradukcyi, jakaja pryvozicca ź Biełarusi, u toj ža miery vyrablajecca i ŭ Sibiry. Rasijskaje vydańnie zadajecca pytańniem, čamu miascovy pakupnik pry padabienstvie tavaraŭ pavinien kuplać «nie svajo» i čamu, naprykład, u Minsku niama nivodnaha handlovaha punkta ź Sibiry.
«Całkam vidavočna, što, kupiŭšy na kirmašy ci ŭ kramie biełaruski alej, kaŭbasu ci syr, novasibirski pakupnik prapuścić pakupku (i nie adnu) tavaraŭ miascovych vytvorcaŭ. Pry hetym u Minsku nivodnaj kramy «Sibirskija pradukty» čamuści niama. Dy i našy ŭłasnyja kirmašy ŭ adkaz u Minsku, dzie biełarusy mahli b kupić kaŭbasu «Handlovaj płoščy», ałtajskija syry i dzikarosy z Tomskaj vobłaści, arhanizavać pakul niejak nie ŭdajecca», — padkreślivaje Ngs.ru.
Biełaruski kirmaš budzie doŭžycca tydzień.
Čytajcie taksama:
«Heta zrobić nas tolki macniejšymi». Biełaruskija vydaŭcy pradavali knihi na kirmašy ŭ Biełastoku