Zatrymany ŭ Ivacevičach rasiejec — kantraktnik rasijskaha vojska. U Biełarusi jon moh rychtavacca da adpraŭki va Ukrainu — «Lusterka»
Adzin z zatrymanych u Ivacevičach 17 červienia rasiejcaŭ moža być vajskoŭcam rasijskaha vojska. «Lusterka» adšukała ŭ sacyjalnych sietkach vielmi padobnaha mužčynu z takim ža imiem, imiem pa baćku i proźviščam, jakimi nazvaŭsia mužčyna, što trapiŭ na videa. Na jaho staroncy značycca, što ŭ krasaviku 2023 hoda jon zaklučyŭ kantrakt ź Minabarony RF terminam na dva hady. Padraździaleńnie, u jakim jon słužyć, moža znachodzicca na terytoryi Biełarusi.
Rasijanin, jaki nazvaŭsia Alaksandram Bykavym (źleva) padčas zatrymańnia ŭ Ivacevičach. Bresckaja vobłaść, 17 červienia 2023 hoda. Fota: «Hancavicki čas»
Adzin z rasiejcaŭ, zatrymanych subotnim viečaram kala adnaho z handlovych centraŭ Ivacevičaŭ, nazvaŭsia Alaksandram Leanidavičam Bykavym.
Žurnalisty znajšli ŭ sacyjalnych sietkach vonkava padobnaha čałavieka z takim imiem, proźviščam i imiem pa baćku.
Jamu 41 hod, jon z Sankt-Pieciarburha (darečy, aŭtamabil zatrymanych, miarkujučy pa numarach, zarehistravany ŭ Leninhradskaj vobłaści).
28 krasavika 2023 hoda Alaksandr Bykaŭ padpisaŭ kantrakt na dva hady z rasijskim Ministerstvam abarony.
Paśla hetaha radavoha zapasu Bykava zaličyli strałkom u bataljonie 283-ha pałka 144-j hvardziejskaj motastrałkovaj dyvizii. Heta złučeńnie ŭvachodzić u skład 20-j hvardziejskaj ahulnavajskovaj armii Zachodniaj vajennaj akruhi.
Vypiska z zahada ab padpisańni kantrakta pamiž Alaksandram Bykavym i rasijskim Ministerstvam abarony. Fota z profilu rasijanina ŭ sacyjalnaj sietcy
Viadoma, što 20-ja hvardziejskaja ahulnavajskovaja armija ŭvachodzić u skład rehijanalnaj biełaruska-rasijskaj hrupoŭki vojskaŭ. Imavierna, padraździaleńnie Alaksandra Bykava znachodzicca niepadalok ad Ivacevičaŭ, na Abuz-Lasnoŭskim ahulnavajskovym palihonie. Tam paśla pačatku rasijskaha ŭvarvańnia va Ukrainu navučajucca častki rasijskaha kampanienta rehijanalnaj hrupoŭki.
Jak ličyć ukrainski bok, paśla navučańnia na terytoryi Biełarusi rasijskija padraździaleńni viartajucca ŭ Rasiju i adtul adpraŭlajucca na vajnu.
Viečaram 17 červienia ŭ Ivacevičach skrucili dvaich rasijan, jakija jechali na aŭto ź litaraj Z na škle.
Paśla źjaŭleńnia videa ŭ siecivie ananimny telehram-kanał, źviazany ź biełaruskimi siłavikami, raskazaŭ padrabiaznaści zatrymańnia. Pavodle jaho infarmacyi, siamja ŭžyvała ałkahol, a z hulanki vyrašyła pajechać na svaim aŭto.
Mašynu spynili supracoŭniki DAI. Rasijanie nie reahavali na papiaredžańni i «atrymali pa poŭnaj prahramie pratakoły nie tolki za pieradaču styrna i pjanuju jazdu, ale i za niepadparadkavańnie».
Čytajcie taksama: