Struktura AAN zapiarečyła, što ŭkrainski biznesmien Firtaš akredytavany pry ich arhanizacyi. Raniej kazali, što jon tam ad Biełarusi
U arhanizacyi AAN pa pramysłovym raźvićci (UNIDO) zajavili, što ŭkrainski biznesmien Dźmitryj Firtaš nie akredytavany pry arhanizacyi. Pra heta piša «Ukrinform» sa spasyłkaj na pres-sakratara UNIDO Kaja Bietkie.
Dźmitryj Firtaš. Fota: AP Photo/Ronald Zak
«Mahu paćvierdzić, što spadar Dźmitryj Firtaš nie akredytavany pry UNIDO», — zajaviŭ Bietkie.
Raniej Deutsche Welle paviedamlała, što Dźmitryj Firtaš sprabuje atrymać dypłamatyčny imunitet praz pracu pry UNIDO — adnym z małaviadomych dla šyrokaj hramadskaści mižnarodnych ahienctvaŭ u struktury AAN, jakoje pavinna spryjać industryjalizacyi postkałanijalnych krain treciaha śvietu.
U tekście rašeńnia Vienskaha suda, na jakoje spasyłałasia DW, było paznačana, što Firtaš maje status «daradcy pastajannaha pradstaŭnictva Respubliki Biełaruś pry mižnarodnych arhanizacyjach u Vienie» jašče z 2021 hoda. Jakraz na padstavie hetaha statusu Firtaš patrabuje spynić praceduru svajoj ekstradycyi ŭ ZŠA, spasyłajučysia na dypłamatyčny imunitet.
16 červienia 2023 hoda paviedamlałasia, što aŭstryjski sud vynies rašeńnie na karyść Firtaša pa spravie ab patrabavańni ekstradavać jaho ŭ ZŠA pa abvinavačvańni ŭ karupcyi.
Ukrainskaha bujnoha biznesmiena Dźmitryja Firtaša zatrymali ŭ Aŭstryi jašče ŭ sakaviku 2014 hoda pa zapycie amierykanskich śledčych, ale paśla vypuścili pad zakład u 125 miljonaŭ jeŭra. Firtašu pahražaje da 50 hadoŭ turmy i kanfiskacyja ŭsich aktyvaŭ, kali jaho ekstradujuć u ZŠA.
Čytajcie taksama:
Rasijskaha miljardera biełaruskaha pachodžańnia chočuć pazbavić šviejcarskaha DNŽ
Abychodzić sankcyi «kašalku Łukašenki» Zajcavu dapamahaje staŭbcoŭski ksiondz Łašuk — BRC