U Rasii prapanavali dałučacca biełaruskim futbolnym kłubam
«Čakajem ad Biełarusi śpis kłubaŭ, jakija mohuć być uklučanyja ŭ rasijskuju premjer-lihu», — skazaŭ ministr sportu Aleh Matycyn.
U budučyni minskaje «Dynama» i hrodzienski «Nioman», jakija sioleta razyhryvajuć załatyja miedali, buduć hulać u rasijskaj premjer-lizie? Fota: FK «Dynama» Minsk.
Ministr sportu Rasii Aleh Matycyn vykazaŭsia pra mahčymaje ŭklučeńnie futbolnych kłubaŭ Biełarusi ŭ čempijanat Rasii pa futbole, paviedamlaje Championat.com.
«My zaraz čakajem prapanoŭ ad Biełarusi pa kłubach. Paśla jaho atrymańnia budziem abmiarkoŭvać hetaje pytańnie z Rasijskim futbolnym sajuzam. Heta stratehičnyja inicyjatyvy, jakija pavinny być zaćvierdžany staršyniami ŭradaŭ. Paśla hetaha jany pavinny być uchvalenyja jak adziny płan u ramkach Sajuznaj dziaržavy. Dumaju, uchvalać. Biełaruski bok zaraz prapracoŭvaje śpis kamand, jakija mohuć być uklučany ŭ čempijanat Rasii. Jość vielmi šmat techničnych pytańniaŭ — naprykład, ci treba aŭtamatyčna braniravać miesca dla biełaruskaj kamandy. Nie ŭpeŭnieny, što my paśpiejem prapracavać usio da nastupnaha siezona», — skazaŭ Matycyn.
Hanarovy prezident Rasijskaha futbolnaha sajuza zajaviŭ, što ŭ mahčymym uklučeńni biełaruskich kłubaŭ u Rasijskuju premjer‑lihu (RPŁ) niama nijakaha spartyŭnaha sensu.
«U hetym niama nijakaha spartyŭnaha sensu, ničoha nie daść rasijskamu futbołu. U spartyŭna-palityčnym, mahčyma, maje značeńnie. Mahčyma, pojduć niejkija novyja inviestycyi ad rekłamy. Rašeńnie pavinny prymać dźvie fiederacyi, kaliści naša adchileńnie skončycca.
Kali budzie sumiesny čempijanat — uźniknuć prablemy. Jość peŭny rehłamient dopusku da kłubnych spabornictvaŭ, tam vyrazna prapisana, što kamandy, jakija pradstaŭlajuć nacyjanalnyja asacyjacyi, pavinny naležać krainie i mnohija inšyja drobiazi», — skazaŭ Kałaskoŭ na «Matč TB».
***
Čempijanat Rasii pa futbole razyhryvajecca pa sistemie vosień — viasna, tady jak čempijanat Biełarusi z-za klimatyčnych asablivaściaŭ pačynajecca ŭ lepšym vypadku ŭ kancy sakavika.
Aproč taho, paśla pačatku poŭnamaštabnaha ŭvarvańnia Rasii va Ukrainu na rasijski futboł nakładzieny mižnarodny ban.
Zbornyja pazbavili ŭdzieł u adboračnych turnirach, a kłuby vykinuli ź jeŭrakubkaŭ. Zbornaja Rasii vymušana zadavolvacca tavaryskimi matčami z zusim nie topavymi zbornymi z Azii i Afryki, robiačy vyhlad, što heta vielmi cikava.
Biełaruski futboł abyšoŭsia małoj kryvioj. Matčy zbornaj i kłubaŭ u jeŭrakubkach pravodziacca na niejtralnym poli.
Čytajcie taksama:
U Šviecyi biasśledna źnik 20-hadovy hulec «Miłana»
«Barsiełona» zhulaje suprać «Reała» ŭ formie z łahatypam Rolling Stones