Biełaruski Čyrvony Kryž hatovy zabrać sabie drony, jakija nie dazvalajuć mieć biełarusam
Biełaruski Čyrvony Kryž prapanavaŭ biełarusam padaravać jamu svaje drony, jakija chutka nie budzie dazvolena trymać u siabie i eksłuatavać u suviazi z ukazam Łukašenki.
Fota: Aliaksandr Barysenka / vecteezy.com
«Naša kamanda hatovaja pryniać ad nasielnictva ŭ jakaści achviaravańnia BPŁA dla ich dalejšaj ekspłuatacyi pry reahavańni na nadzvyčajnyja situacyi», — havorycca ŭ paviedamleńni Biełaruskaha Čyrvonaha Kryža.
Maŭlaŭ, supracoŭniki hetaj praŭładnaj arhanizacyi «ŭ svajoj dziejnaści pa akazańni dapamohi paciarpiełamu nasielnictvu časta vykarystoŭvajuć BPŁA dla acenki situacyi i reahavańnia na jaje». Heta nibyta robicca pry pavodkach, mocnych apadkach, a taksama pry pošuku ludziej, jakija zhubilisia ŭ lasach, dla chutkaha akazańnia pieršaj dapamohi.
Pradstaŭnictva Čyrvonaha Kryža ŭ Biełarusi — praŭładnaja, faktyčna, psieŭdahramadskaja arhanizacyja, jakaja biezahavoračna padtrymlivaje režym Łukašenki va ŭsich jaho dziejańniach jak na słovach, tak i na spravie.
Dziejnaść hetaj arhanizacyi nie adpaviadaje takim zajaŭlenym pryncypam, jak niezaležnaść, niejtralnaść, biesstaronnaść i dobraachvotnaść.
Paśla pačatku vajny Rasii z Ukrainaj Biełaruskaje tavarystva Čyrvonaha Kryža ŭdzielničała ŭ vyvazie ŭkrainskich dziaciej z akupavanych terytoryj na terytoryju Biełarusi, hienieralny sakratar BTČK Dźmitryj Šaŭcoŭ asabista naviedvaŭ Danbas, majučy na svaim adzieńni simvał rasijskaj ahresii — łacinskuju litaru Z.
U suviazi z hetym, a taksama z-za admovy Šaŭcova pakinuć pasadu kiraŭnika arhanizacyi, Mižnarodnaja fiederacyja tavarystvaŭ Čyrvonaha Kryža i Čyrvonaha Paŭmiesiaca z 1 śniežnia prypyniła siabroŭstva BTČK u svaim składzie.
Ukaz Łukašenki «Ab dziaržaŭnym uliku i ekspłuatacyi cyvilnych bieśpiłotnych latalnych aparataŭ» byŭ padpisany 25 vieraśnia 2023 hoda. Jon zabaraniaje fizičnym asobam uvoz, ekspłuatacyju i vyrab dronaŭ, a praz paŭhoda z momantu apublikavańnia (z 25 sakavika 2024 hoda) — i ich zachoŭvańnie dy abaračeńnie.
Čytajcie taksama:
Alaksiej Tałaj staŭ hanarovym siabram Biełaruskaha Čyrvonaha Kryža