Druhi štat ZŠA zabaraniŭ Trampu bałatavacca
Eks-prezident moža asprečyć heta rašeńnie ŭ sudzie.
Donald Tramp. Fota: Sue Ogrocki / AP
Štat Men staŭ druhim paśla Kałarada štatam ZŠA, u jakim imia Donalda Trampa aficyjna zabaroniena ŭklučać u biuleteni na prezidenckich vybarach. Praŭda, u abodvuch vypadkach hetaja zabarona, chutčej za ŭsio, budzie asprečana ŭ sudach, piša Bi-bi-si.
Dziaržaŭny sakratar štata Men Šena Bełoŭz, jak i Viarchoŭny sud Kałarada, abhruntavała svaju pastanovu ŭ dačynieńni da Trampa 14-j papraŭkaj da Kanstytucyi, jakaja zabaraniaje bałatavacca ŭdzielnikam miaciažu.
Jana, siabra Demakratyčnaj partyi, ličyć, jak i mnohija apanienty Trampa, što jon damahaŭsia admieny vynikaŭ prezidenckich vybaraŭ 2020 hoda i padbuchtorvaŭ svaich prychilnikaŭ da šturmu Kapitolija ŭ studzieni 2021 hoda.
Praciŭniki Trampa raspačali sproby zabaranić jamu bałatavacca na padstavie 14-j papraŭki ŭ niekalkich štatach.
Sudy ŭ Mičyhanie i Miniesocie adchilili ich pazovy. Viarchoŭny sud Kałarada pryniaŭ stanoŭčaje rašeńnie hałasami čatyroch sudździaŭ suprać troch.
Va ŭsich hetych vypadkach rašeńni buduć asprečanyja ŭ Viarchoŭnym sudzie ZŠA. Pry hetym amierykanskija jurysty adznačajuć, što pradstaŭnikam Kałarada budzie nialohka adstajać rašeńnie svajho suda, pakolki ŭ Viarchoŭnym sudzie ZŠA pieravaha ŭ sudździaŭ kansiervatyŭnych pohladaŭ.
Kali zabarona ŭ jakim-niebudź štacie abo štatach zastaniecca ŭ sile, to Tramp aŭtamatyčna pazbavicca hałasoŭ vybarščykaŭ ad hetaha štata abo štataŭ.
Na vybarach prezidenta ZŠA hałasy ŭsich vybarščykaŭ štata adychodziać tamu kandydatu, jaki nabraŭ u hetym štacie bolšaść, niezaležna ad taho, kolki atrymali kankurenty.
Usiaho vybarščykaŭ 538, u štata Kałarada — 10 ź ich, u štata Men — čatyry.
14-ja papraŭka da Kanstytucyi ZŠA była pryniataja ŭ XIX stahodździ, paśla Hramadzianskaj vajny, z tym, kab nie dapuścić viartańnia va ŭładu dziejačaŭ Kanfiederacyi paŭdniovych štataŭ, jakija žadali adździaleńnia ad Poŭnačy.
Čytajcie taksama:
Sud u Kałarada zabaraniŭ Trampu ŭdzielničać u prezidenckich vybarach
Pry Trampie ź Biełaha doma źnikła tečka z raźvieddanymi pra Rasiju
Sud admoviŭ Trampu ŭ spynieńni kryminalnaj spravy ab umiašańni ŭ vybary