Pry Trampie ź Biełaha doma źnikła tečka z raźvieddanymi pra Rasiju

U kancy prezidenctva Donalda Trampa ź Biełaha doma źnikła tečka, jakaja źmiaščaje vielmi zasakrečanuju infarmacyju, u tym liku materyjały ab umiašańni Rasii ŭ vybary, paviedamili amierykanskija ŚMI sa spasyłkaj na krynicy, znajomyja z pytańniem, piša RBK.

Pa ich słovach, źniknieńnie dakumientaŭ vyklikała vialikuju tryvohu: supracoŭniki raźviedki ŭ minułym hodzie apaviaścili kiraŭnikoŭ sienackaha kamiteta pa raźviedcy ab źnikłych materyjałach i namahańniach urada pa ich pošuku.

Niekatoryja źviestki z hetaj tečki taŭščynioj 10 calaŭ (25,4 sm) byli rassakrečanyja, adnak u joj utrymlivajucca nieapracavanyja raźviedvalnyja źviestki, sabranyja Vašynhtonam i jaho sajuźnikami ŭ NATO ab rasijskich ahientach, uklučajučy krynicy i mietady, jakija lahli ŭ asnovu acenki ŭrada ZŠA ab tym, što prezident Rasii Uładzimir Pucin imknuŭsia dapamahčy Trampu pieramahčy na vybarach 2016 hoda, raspaviali krynicy CNN.

Apošni raz tečku bačyli ŭ Biełym domie ŭ apošnija dni znachodžańnia Trampa na pasadzie. Eks-prezident rasparadziŭsia dastavić jaje tudy, kab jon moh rassakrecić mnostva dakumientaŭ, źviazanych z rasśledavańniem FBR u dačynieńni da Rasii.

Praca nad redahavańniem najbolš kanfidencyjnaj infarmacyi, kab jaje možna było apublikavać, viałasia pad nahladam tahačasnaha kiraŭnika administracyi Biełaha doma Marka Miedoŭza.

Usiaho za niekalki chvilin da inaŭhuracyi Džo Bajdena ŭ studzieni 2021 hoda Miedoŭz paśpiašaŭsia ŭ Ministerstva justycyi, kab uručyć adredaktavanuju kopiju dla apošniaha aznajamleńnia. Miniust ZŠA dahetul nie apublikavaŭ usie dakumienty, kopii apynulisia ŭ Nacyjanalnym archivie.

Adna z hałoŭnych pamočnic Miedoŭza Kesidzi Chatčynsan u pakazańniach pa spravie ab zachopie Kapitolija 6 studzienia 2021 hoda i ŭ svaich miemuarach vykazała zdahadku, što jon zabraŭ nieadredahavanyja materyjały. Pavodle jaje słoŭ, tečka zachoŭvałasia ŭ siejfie Miedoŭza, a jana bačyła, jak jon vychodziŭ z dakumientami ź Biełaha doma.

Sam Tramp taksama zajaviŭ, što materyjały ŭ Miedoŭza. U intervju ŭ krasaviku 2021 hoda dla knihi pra prezidenctva Trampa eks-prezident nie adkazaŭ na pytańnie, ci jość dakumienty ŭ jaho, ale na pytańnie, ci jość jany ŭ Miedoŭza, adkazaŭ śćviardžalna, piša NYT. «Ja b dazvoliŭ vam zirnuć na ich, kali b vy zachacieli, — skazaŭ jon tady. — Heta sapraŭdnaja skarbnica».

Advakat Miedoŭza Džordž Tervilihier III kateharyčna admaŭlaje, što toj niapravilna abychodziŭsia ź jakoj-niebudź sakretnaj infarmacyjaj u Biełym domie, zajaŭlajučy, što lubaja zdahadka ab tym, što Miedoŭz byŭ adkazny za prapažu sakretnaj infarmacyi, była «kateharyčna niasłušnaj».

Pavodle pakazańniaŭ i sudovych dakumientaŭ, u Miedoŭza była kopija materyjału z papki, pieradadzienaja pa mienšaj miery adnamu kansiervatyŭnamu piśmieńniku. Adnak paźniej usie kopii zabrali.

Jak havaryłasia ŭ pazovie piśmieńnika-kansiervatara Džona Sałamona, jamu pieradali tečku na karotki čas dla aznajamleńnia 19 studzienia 2021 hoda. Zatym Bieły dom zapatrabavaŭ viarnuć usie materyjały Sałamona, Miedoŭz abiacaŭ pieradać adredaktavanuju viersiju, ale tak hetaha i nie zrabiŭ. Paźniej Sałamon zapytaŭ dakumienty ŭ Nacyjanalnaha archiva, ale tam zajavili, što tečka ŭsio jašče znachodzicca ŭ Miniuście.

Piśmieńnik padaŭ pazoŭ z prośbaj dać dostup. U im havaryłasia, što ŭ tečcy naličvajecca kala 2700 staronak, ź jakich byli rassakrečanyja mienš za 600.

Krynicy CNN i NYT adznačajuć, što tečku nie znajšli siarod sakretnych dakumientaŭ, vyjaŭlenych pry letašnim pieratrusie viły Trampa ŭ Mar-a-Łaha. U červieńskim abvinavaŭčym zaklučeńni suprać Trampa ŭ hetaj spravie taksama niama zhadak pra jaje abo źnikłych raźvieddanych pra Rasiju, padkreślivajuć ŚMI.

• 0
• 0
• 4
• 12
• 3
• 0
• 18
• 0