Anioł hłamurnaha nieba
Džordž Kłuni ŭ filmie «Mnie b u nieba» Džejsana Rejtmana — strymana ramantyčnym, nie biez humaru.
Rajan (Džordž Kłuni) — admysłoviec, jaki zvalniaje ludziej. Pracy siońnia šmat – i Rajan nosicca z horadu ŭ horad, žyvie pa hatelach i aeraportach. Hieroj maryć nalatać rekordnyja 10 milijonaŭ milaŭ. Ale maładaja karjerystka z jahonaje firmy pahražaje samoha hieroja pakinuć biez chleba. Da taho ž u pieralotach samotny Rajan paznajomiŭsia z pryhažuniaj (Viera Farmiha), taksama daśviedčanaj u aeraportnym žyćci…
Drama Džejsana Rejtmana — strymana ramantyčnaja, nie biez humaru. Abaviazkovyja amierykanskija temy — «mianie padstavili» i «lohki flirt siaredniaha vieku». Ale zvykłaja halivudskaja drama maje mietafizična-hłamurny padtekst.
Hieroj Džordža Kłuni — anioł hramadskaje śmierci. Jon raić nie źbirać na ziamli skarbaŭ, pazbavicca lišniaha bahažu. Ale i ludskija sercy dla jaho ničoha nie značać.
Jahonaje nieba — chałodna-hłamurny raj brendaŭ i statusaŭ. Paluboŭniki Džordž Kłuni i Viera Farmiha, daviačysia ad iraničnaje pychi, demanstrujuć adzin pierad adnym šyldy j cetliki. A naviaźlivaj rekłamie hatela «Chiłtan» pazajzdrościŭ by i Cimur Biekmambietaŭ.
Seksualnaść, stomlenaść, falšyva-badzioraja nadzieja na lepšaje, samota i vietlivaja pusteča.
U časy zakatnaha posmadernu dyj ekanamičnaha kryzisu amierykancaŭ suciašaje dalikatny padniabiosny ehaist.
Zaciaty samotnik Džordž Kłuni idealna pasuje dla hetaje roli.