U parłamiencie Małdovy prachodziać pieratrusy. Padobna, što znoŭ špijanaž

U Kišyniovie supracoŭniki Słužby infarmacyi i biaśpieki (SIB) sumiesna z prakuraturaj pa baraćbie z arhanizavanaj złačynnaściu i asablivych spravach 31 lipienia pravodziać pieratrusy ŭ budynku parłamienta Małdovy ŭ miežach kryminalnaj spravy. Pra heta «Radyjo Svaboda» paviedamiła pres-sakratarka SIB Danieła Mynzat.

Parłamient Małdovy. Fota: parlament.md

Infarmacyju pra pieratrusy taksama paćvierdziŭ pradstaŭnik prakuratury Małdovy Emil Hajtur. Pra jakuju kryminalnuju spravu idzie havorka, čynoŭniki nie ŭdakładniajuć.

Miž tym krynicy małdaŭskaj słužby «Radyjo Svaboda» paviedamlajuć, što rasśledavańnie viadziecca ŭ spravie ab špijanažy ŭ dačynieńni da kiraŭnika jurydyčnaha departamienta parłamienta Małdovy Ijona Kranhe. Pavodle surazmoŭcaŭ miedyja, čynoŭnika złavili z dokazami złačynstva, kali jon pieradavaŭ infarmacyju supracoŭnikam ambasady Rasii ŭ Kišyniovie.

Pavodle krynic vydańnia NewsMaker, pieratrusy źviazanyja z rasśledavańniem spravy ab zdradzie radzimie.

Kali infarmacyja ab špijanažy paćvierdzicca aficyjna, heta budzie druhi padobny vypadak u Małdovie za apošnija dva miesiacy.

Raniej stała viadoma, što eks-načalnik Hienštaba Małdovy Ihar Horhan źlivaŭ sakretnuju infarmacyju svaim kurataram z HRU Rasii.

Kamientary da artykuła