U Małdovie rasśledujuć spravu ab umiašańni ŭ pracu Interpoła z udziełam «asob ź Biełarusi»
4 červienia ŭ Małdovie prajšli pieratrusy ŭ ramkach rasśledavańnia kryminalnaj spravy ab podkupie słužbovych asob Małdovy i inšych krain z metaj pieraškodzić publikavać «čyrvonyja kartki» Interpoła, vydadzienyja dla vyšuku mižnarodnych złačyncaŭ. Sprava rasśledujecca sumiesna z Francyjaj pry sadziejničańni FBR, paviedamlaje antykarupcyjnaja prakuratura Małdovy.
Sutnaść schiemy palahała ŭ tym, kab dać mahčymaść asobam, na jakich byli vydadzienyja «čyrvonyja kartki» atrymać prytułak abo status uciekača ŭ Małdovie ci inšych krainach, kab zabłakavać apaviaščeńni Interpoła ab vyšuku. Dla hetaha padazravanyja padkuplali čynoŭnikaŭ, u tym liku małdoŭskich.
Suma chabaraŭ aceńvajecca ŭ niekalki miljonaŭ dalaraŭ.
Pavodle materyjałaŭ spravy, u karupcyjnuju schiemu byli zamiašanyja asoby roznych nacyjanalnaściaŭ. Złačynnaja hrupa, jakaja płaciła za infarmacyju pra «čyrvonyja kartki», maje suviazi z asobami ŭ Biełarusi, Rasii i Ukrainie, miarkuje śledstva.
«Dadatkovyja dokazy dazvalajuć vykazać zdahadku, što ŭ ramkach pierakryvanaj karupcyjnaj schiemy mižnarodnaja złačynnaja arhanizacyja, jakaja maje suviazi z asobami ŭ Rasii, Ukrainie, Biełarusi i inšych krainach, padazravanaja ŭ ździajśnieńni kibierzłačynstvaŭ, jakija pryčynili škodu ŭ miljony dalaraŭ, zapłaciła chabary pasiarednikam i słužbovym asobam u Respublicy Małdova dla infarmavańnia złačyncaŭ, jakija vyšukvajucca, pra status čyrvonych kartak u abmien na ŭznaharodžańnie», — paviedamlaje antykarupcyjnaja prakuratura Małdovy.
U ramkach rasśledavańnia ŭ Małdovie prajšli 33 pieratrusy ŭ 12 čałaviek. Byli kanfiskavanyja ličbavyja pryłady, uklučajučy mabilnyja telefony, noŭtbuki i kampjutary, inšyja pradmiety i dakumienty, jakija mohuć być dokazami ździajśnieńnia złačynstva. Čatyroch čałaviek zatrymali na 72 hadziny.
Kamientary