Ukraina za tydzień zachapiła takuju ž płošču Kurskaj vobłaści, jakuju Rasija zachapiła va Ukrainie z pačatku hoda

Zajava hałoŭnakamandujučaha USU Alaksandra Syrskaha, što Ukraina zachapiła 1000 kv. km rasijskaj terytoryi, dazvalaje paraŭnać dasiahnieńni USU ŭ chodzie apošniaha nastupu z dasiahnieńniami Rasii padčas jaje apošniaha nastupu, jaki pačaŭsia ŭ kastryčniku minułaha hoda, piša «Ahientstvo». 

Načalnik Hienieralnaha štaba RF hienierał Valeryj Hierasimaŭ na sustrečy z prezidentam Rasii Uładzimiram Pucinym, pryśviečanaj situacyi ŭ Kurskaj i Biełharadskaj pryhraničnych abłaściach, 12 žniŭnia 2024 h. Fota: Gavriil Grigorov, Sputnik, Kremlin Pool Photo via AP

Kali vieryć danym Syrskaha, zachoplenaja Ukrainaj za tydzień terytoryja paraŭnalnaja z tym, što Rasija zavajavała z pačatku hoda i ŭsiaho na 131 kv km mienš, čym Rasija zavajavała z pačatku jaje apošniaha nastupu, jaki pačaŭsia 10 kastryčnika 2023 hoda. Pra heta śviedčyć analiz vydańnia, praviedzieny na asnovie danych ukrainskaha OSINT-prajekta DeepState.

Danyja Minabarony RF i vajennych błohieraŭ śviedčać ab tym, što ŭ apošnija dni płošča bajavych dziejańniaŭ u Kurskaj vobłaści pašyrajecca, a heta značyć, što Ukraina moža ŭžo ŭ najbližejšyja dni zachapić u Rasii bolš terytoryi, čym Rasija zaniała va Ukrainie z kastryčnika minułaha hoda.

️Zrešty, Rasija praciahvaje pavialičvać płošču zachoplenaha ŭ Danieckaj vobłaści, pryčym tymi ž tempami, jakimi i da nastupleńnia Ukrainy na Kurskuju vobłaść.

Kamientary da artykuła