U Rasii žorstka zatrymali vajennaha błohiera «Trynaccataha»

U horadzie Navapaŭłaŭsk Staŭrapalskaha kraju zatrymali Jahora Huzienku, bolš viadomaha jak vajenny błohier «Trynaccaty». Pra svajo zatrymańnie jon paviedamiŭ sam, zapisaŭšy paviedamleńnie ŭ telehramie.

U Navapaŭłaŭsk jon pryjechaŭ praviedać siamju.

Na fota, jakoje apublikavaŭ kanał «Błoknot Stavropol», vidać, što zatrymańnie Huzienki rabiłasia žorstkimi mietadami. Paćviardžaje heta i apubličanaje videa.

Blizki da rasijskich siłavikoŭ telehram-kanał Baza paviedamlaje, što «Trynaccataha» zatrymali pa administracyjnym artykule ab užyvańni narkotykaŭ. Pakolki jon admoviŭsia ad miedycynskaha ahladu, jaho zavieźli ŭ AUS.

Zatrymali Z-vajenkara na centralnaj haradskoj płoščy prosta padčas kancerta ŭ honar Dnia horada.

Jahor Huzienka ŭdzielničaŭ u vajnie z Ukrainaj z samaha jaje pačatku ŭ 2014 hodzie, vajujučy na Danbasie. Ale pry hetym, viartajučysia z Rasii, pavodziŭ siabie zusim nie cicha, za što mieŭ prablemy. 

Viadoma, što ŭ 2022 hodzie Huzienka ŭžo znachodziŭsia pad chatnim aryštam, ale parušyŭ mieru strymańnia i samavolna pajechaŭ na vajnu z Ukrainaj, paśla čaho byŭ abvieščany ŭ fiederalny vyšuk.

A zatrymali jaho ŭvosień 2021 hoda ŭ Sankt-Pieciarburhu paśla bojki z tryma mužčynami. Błohier tady zajaŭlaŭ, što adbivaŭsia ad ich z aerazolnym pistaletam, a ŭ adździele palicyi, kudy jaho dastavili, prabiŭ ścianu, sprabujučy źniać kajdanki. 

Błohier «Trynaccaty» maje bolš za 300 tysiač padpisčykaŭ, i jon adzin z tych rasijskich vajenkaraŭ, jakija choć paśladoŭna trymajucca šavinistyčnaj dy antyŭkrainskaj pazicyi, ale mohuć žorstka krytykavać i rasijskija vajskovyja dy hramadzianskija ŭłady, zakranajučy prynamsi ŭskosna navat samoha Pucina. Miesiac tamu Huzienka adrazu ŭ niekalkich pastach pravodziŭ dumku, što «zdradniki siadziać u Kramli».

Kamientary da artykuła