Danija moža adkazać amierykancam za Hrenłandyju asimietryčnym udaram. I heta budzie adčuvalna dla elit

Choć Danija i nie moža pachvalicca pieršaj armijaj u śviecie i mahutnym fłotam dla abarony Hrenłandyi, ale kraina maje niekalki niepryjemnych siurpryzaŭ dla ZŠA, adzin ź jakich moža istotna paŭpłyvać na fihury bahatych amierykancaŭ.

Sprečki Danii (źleva) i ZŠA (sprava) vakoł Hrenłandyi (źvierchu ŭ centry). Foty: Vecteezy. Kałaž: «Naša Niva»

Padčas pieršaha terminu na pasadzie prezidenta ZŠA Donald Tramp nieadnarazova vykazvaŭ ideju adnosna kupli Hrenłandyi. Tady hetyja zajavy ŭsprymalisia jak žart, ale ciapier, kali Tramp paŭtaraje svaje zakliki i supravadžaje ich pahrozami na adras Danii i niekalkich inšych sajuznych krain, situacyja vyhladaje bolš surjoznaj.

Adnak Danija, niahledziačy na maleńkuju armiju i niesuvymiernuju z ZŠA ekanomiku, daloka nie takaja biezabaronnaja ŭ hetaj situacyi. Kraina maje niekalki mahutnych ekanamičnych i palityčnych instrumientaŭ, zdolnych prymusić ZŠA zadumacca, piša vydańnie Foreign Policy.

Pa-pieršaje, u Danii znachodzicca kampanija Maersk — druhaja ŭ śviecie pa mahutnaści sudnachodnaja linija, jakaja śpiecyjalizujecca na kantejniernych pieravozkach. Bolš za 14% usiaho suśvietnaha fłotu kantejnieravozaŭ naležyć dackaj Maersk, i ŭ 2023 hodzie kampanija pieraviezła kala 24 miljonaŭ kantejnieraŭ na svaich 672 sudnach. Kali ŭłady Danii zahadajuć Maersk spynić pieravozki ŭ ZŠA, heta moža pryvieści da surjoznych łahistyčnych prablem dla amierykanskaha biznesu i spažyŭcoŭ. Taki krok staŭ by balučym udaram dla ekanomiki ZŠA.

Druhi mahutny ryčah Danii — heta farmaceŭtyčny hihant Novo Nordisk, vytvorca siemahłutydu, asnoŭnaha inhredyjentu miehapapularnych u ZŠA preparataŭ dla pachudzieńnia i lačeńnia dyjabietu Ozempic i Wegovy, jakimi karystajucca miljony zamožnych amierykancaŭ, siarod jakich mnohija pradstaŭniki palityčnych, kulturnych, intelektualnych elit.

Hetyja preparaty zrabili revalucyju ŭ miedycynie ZŠA, i popyt na ich imkliva raście. Kolkaść receptaŭ na Ozempic u Amierycy padskočyła na 400% za pieryjad z 2021 pa 2023 hod, dasiahnuŭšy 2,6 miljona ŭ kancy 2023 hoda. Bolš za paŭmiljona amierykancaŭ prymali Wegovy u mai 2023 hoda.

Pakul što vytvorčaść siemahłutydu amal całkam zasiarodžanaja ŭ Danii, i navat niahledziačy na sproby amierykanskich kampanij stvaryć alternatyvu, sapraŭdny Ozempic vyrabić u ZŠA pakul nie ŭdałosia.

Dacki farmaceŭtyčny hihant Novo Nordisk zarablaje vielizarnyja hrošy na rynku ZŠA, i, kab zadavolić popyt, kampanija inviestavała $4,1 miljarda ŭ budaŭnictva novaha pradpryjemstva ŭ Paŭnočnaj Karalinie, jaki vyrablaje siemahłutyd. Ale kali płany ZŠA pa Hrenłandyi zojduć zanadta daloka, dacki ŭrad moža zahadać Novo Nordisk całkam spynić biznes u ZŠA i abmiežavać tudy svaje pastaŭki.

Dziejańni Danii ŭ adkaz mohuć stać surjoznym udaram dla Złučanych Štataŭ, asabliva ŭličvajučy, što jak Maersk, tak i Novo Nordisk majuć važnaje stratehičnaje značeńnie dla amierykanskaj ekanomiki. Heta moža pieratvaryć namiery Trampa pa Hrenłandyi ŭ niebiaśpiečnuju avanturu, jakaja stvoryć dla jaho bolš prablem, čym vyhady, padahulniaje Foreign Policy.

Kamientary da artykuła