ZŠA prypyniali pastaŭki zbroi Ukrainie, ale ŭžo adnavili

Pavodle danych ahienctva Reuters, prypynieńnie vajskovych pastavak ZŠA adbyłosia na minułym tydni, a adnavilisia jany ŭžo ŭ hetyja vychadnyja. 

Prezident ZŠA Donald Tramp. Fota: Anna Moneymaker / Getty Images

Ni ZŠA, ni Ukraina pra prypynieńnie pastavak publična nie havaryli. Usio heta adbyvajecca na fonie taho, jak administracyja Donalda Trampa abmiarkoŭvaje svaju dalejšuju palityku ŭ dačynieńni da Ukrainy.

Supracoŭniki administracyi Trampa razychodziacca ŭ mierkavańniach adnosna taho, nakolki ZŠA pavinny akazvać dapamohu Kijevu, adpraŭlajučy zbroju sa svaich zapasaŭ, skazała adna z krynic Reuters. I hetaja karotkaja paŭza ŭ pastaŭkach śviedčyć, nakolki intensiŭnaje abmierkavańnie idzie ŭnutry administracyi.

Bieły dom na zapyt žurnalistaŭ adnosna niepasrednaha kamientara nie adkazaŭ.

Z taho času, jak Donald Tramp zaniaŭ pasadu prezidenta ZŠA, jon nie abviaščaŭ pra novyja pakiety vajskovaj dapamohi Ukrainie, ale mierkavałasia, što pastaŭki, uchvalenyja Džo Bajdenam, praciahnucca jašče niekalki miesiacaŭ.

Tym časam Tramp padpisaŭ ukaz ab pryznačeńni Kita Kiełaha specpradstaŭnikom pa Ukrainie i Rasii. «My dasiahnuli značnaha prahresu ŭ dačynieńni da Rasii i Ukrainy», — skazaŭ jon, nie ŭdakładniajučy padrabiaznaściaŭ.

Taksama Tramp vykazaŭ zacikaŭlenaść u nabyćci ŭkrainskich redkaziamielnych mietałaŭ u abmien na dapamohu z boku ZŠA.

Kamientary da artykuła