U sankcyjny śpis Trampa trapiŭ prakuror MKS, jaki vydaŭ ordar na aryšt Pucina
Prezident ZŠA Donald Tramp źbirajecca nakłaści sankcyi na hałoŭnaha prakurora Mižnarodnaha kryminalnaha suda Karyma Chana, jaki rasśledavaŭ vajennyja złačynstvy Rasii i vydaŭ ordar na aryšt Uładzimira Pucina. Pra heta piša Reuters sa spasyłkaj na nienazvanyja daśviedčanyja krynicy, u pryvatnaści z samoha MKS.
Karym Chan. Fota: AP Photo/Ariana Cubillos
Imia Karyma Chana źjaviłasia ŭ jašče nie apublikavanym dadatku da ŭkazu Trampa ab sankcyjach suprać MKS. Sankcyi suprać ludziej z hetaha śpisu praduhledžvajuć zamarožvańnie amierykanskich aktyvaŭ i zabaronu im i ich siemjam naviedvać Złučanyja Štaty.
Žurnalisty pišuć, što prakuror staŭ pieršym čałaviekam u hetym sankcyjnym śpisie. Poŭny pieralik na praciahu 60 dzion pavinien padać ministr finansaŭ ZŠA Skot Biesent paśla kansultacyi ź dziaržsakratarom Markam Rubia.
Mienavita Karym Chan chadajničaŭ ab ordary na aryšt rasijskaha lidara Uładzimira Pucina pa padazreńni ŭ niezakonnym pieramiaščeńni i departacyi ŭ Rasiju nasielnictva, u pryvatnaści dziaciej, z akupavanych terytoryj Ukrainy.
6 lutaha prezident ZŠA Donald Tramp padpisaŭ ukaz ab prymianieńni sankcyj suprać mižnarodnaha kryminalnaha suda (MKS), abvinavaciŭšy jaho ŭ «niepravamiernych dziejańniach» da Złučanych Štataŭ, Izraila i ich sajuźnikaŭ. Pry hetym ukaz abvinavačvaje ŭstanovu ŭ «nielehitymnych i biespadstaŭnych dziejańniach».
Čytajcie taksama:
Tramp uvodzić sankcyi suprać Mižnarodnaha kryminalnaha suda
«Reparciory bieź miežaŭ» padali na Łukašenku ŭ Mižnarodny kryminalny sud
Mižnarodny kryminalny sud vydaŭ ordar na aryšt Bińjamina Nietańjachu
Orban nazvaŭ cyničnym ordar na aryšt Nietańjachu i demanstratyŭna zaprasiŭ jaho ŭ Vienhryju