Ekśpierymientalnuju supraćhałalodnuju sumieś, jakoj pasypali vulicy Minska, pryznali nierentabielnaj

Novaja supraćhałalodnaja sumieś, jakoj u śniežni minułaha hoda pačali pasypać vulicy Mienska, akazałasia nierentabielnaj. U hetym 7 lutaha ŭ efiry «Radyjo-Minsk» pryznaŭsia hienieralny dyrektar unitarnaha pradpryjemstva «Harramaŭtadar Minharvykankama» Maksim Biełavus, piša Telegraf.news.

Fota ilustracyjnaje

Biełavus paviedamiŭ, što ad ekśpierymientalnaj sumiesi, raspracavanaj sumiesna z navukoŭcami z Nacyjanalnaj akademii navuk Biełarusi, vyrašyli admovicca, pakolki kłasičny reahient pakazaŭ siabie ŭ pracy lepš.

Kancentrat minieralny halit marki A vykarystoŭvajecca dla apracoŭki daroh i tratuaraŭ ŭ chałodnuju paru hoda, kab praduchilić utvareńnie hałalodu i abledzianieńnia. U skład halitu ŭvachodzić natryj chłaryd, jaki panižaje tempieraturu zamiarzańnia vady i palapšaje sčapleńnie z darožnym pakryćciom.

Pavodle słoŭ hiendyrektara Harramaŭtadara, ekśpierymientalnaj sumieśsiu ŭ śniežni minułaha hoda apracavali dva ŭčastki ŭ Minsku — na ŭčastku praśpiekta Niezaležnaści i ŭ rajonie vulic Uljanaŭskaj i Śviardłova. Paśla hetaha śpiecyjalisty acanili ŭ dynamicy, na kolki novaje rečyva źmienšyła niehatyŭnaje ŭździejańnie na mietały i raśliny.

«Na žal, vyniki akazalisia ŭ miežach statystyčnaj chibnaści — źmianšeńnie ahresiŭnaha ŭździejańnia na 1,5-2%», — padzialiŭsia vynikam ekśpierymientu Biełavus.

Pry hetym košt sumiesi, u paraŭnańni z halitami marki A, jakija dahetul dobra siabie zarekamiendavali, značna vyšejšy, tamu jaje prymianieńnie pryznali «prosta nierentabielnym».

«Metazhodnaj zamiena była b tolki pry ŭmovie źnižeńnia niehatyŭnaha ŭździejańnia choć by na 15-20%», — rastłumačyŭ śpiecyjalist.

Jon taksama zapeŭniŭ, što «lišniuju sol», na jakuju niaredka skardziacca zimoj i aŭtamabilisty, i piešachody, rabotniki ŽKH i darožnych słužbaŭ nie rassypajuć. Pa słovach Biełavusa, jany kirujucca zaćvierdžanymi normami, jakija zaležać ad takich umoŭ nadvorja, jak taŭščynia śniehavoha pokryva i tempieratura pavietra.

Hiendyrektar Harramaŭtadara rastłumačyŭ, što kolkaść reahienta, jaki rassypajecca na darohach, pavialičvajecca z panižeńniem na kožnyja piać hradusaŭ.

«Pry hetym kali isnuje vierahodnaść utvareńnia naledzi, to lepš i biaśpiečniej heta papiaredzić, čym aščadžać», — vykazaŭ svajo mierkavańnie Biełavus.

Kamientary da artykuła