Kreml prapanavaŭ Trampu rasijskuju naftu i dostup u Arktyku

Pakul prezident Ukrainy Uładzimir Zialenski razvažaŭ ab padpisańni pahadnieńnia z ZŠA ab karysnych vykapniach, Kreml prapanavaŭ administracyi Donalda Trampa damovu ab rasijskich pryrodnych resursach, piša The Moscow Times. 

Fota: Alexander Manzyuk / Anadolu Agency via Getty Images

Rasija miarkuje, što amierykanskija naftavyja kampanii mohuć viarnucca ŭ krainu, a akramia taho, zacikaŭlena ŭ sumiesnych z ZŠA prajektach u Arktycy, zajaviŭ pierad pačatkam pieramoŭ u Saudaŭskaj Aravii kiraŭnik Rasijskaha fondu pramych inviestycyj Kirył Dźmitryjeŭ.

Pa słovach Dźmitryjeva, adnaho z troch delehataŭ, vybranych Uładzimiram Pucinym dla sustrečy z amierykancami ŭ Er-Ryjadzie, u Maskvie ličać važnym adnaŭleńnie ekanamičnaha supracoŭnictva z ZŠA.

U bujnych naftavych kampanij ZŠA ŭ Rasii byŭ «vielmi paśpiachovy biznes», skazaŭ Dźmitryjeŭ: «My vierym, što ŭ niejki momant jany viernucca, tamu što čamu b jany stali admaŭlacca ad mahčymaści dostupu da rasijskich pryrodnych resursaŭ, jakuju davała im Rasija?»

«Nam treba taksama rabić sumiesnyja prajekty, u tym liku, naprykład, i ŭ Arktycy, i ŭ inšych halinach, sumiesnyja prajekty dazvolać nam być bolš paśpiachovymi», — praciahnuŭ Dźmitryjeŭ.

Pavodle jaho słoŭ, amierykanskija kampanii nibyta stracili $300 młrd ad sankcyj suprać Rasii, a administracyja Džo Bajdena «davała vielmi šmat niapravilnych pasyłaŭ» pra stan rasijskaj ekanomiki.

Da ŭvarvańnia va Ukrainu tolki adna bujnaja amierykanskaja kampanija zajmałasia zdabyčaj nafty ŭ Rasii: heta Exxon Mobil, jakoj naležyć 30% u prajekcie «Sachalin-1».

Paśla ŭviadzieńnia sankcyj kampanija abviaściła ab vychadzie z prajekta, ale pradać dolu tak i nie zmahła: pieršapačatkova mierkavałasia, što heta adbudziecca ŭ 2023 hodzie, adnak Kreml dvojčy padaŭžaŭ terminy — u apošni raz da kanca 2026 hoda.

Paśla pačatku vajny ab sychodzie z Rasii abviaścili taksama viadučyja amierykanskija naftaservisnyja kampanii — Halliburton, Schlumberger i Baker Hughes, z dapamohaj jakich u krainie ŭdałosia adnavić zdabyču paśla abvału ŭ apošnija hady SSSR.

Prezident Uładzimir Pucin patrabavaŭ, kab da 2025 hoda ŭ krainie byli stvorany ŭłasnyja technałohii bureńnia i raźviedki vuhlevadarodaŭ, a ich dola dasiahnuła b 80%. Ale ŭ realnaści bolš za pałovu abstalavańnia dla hidrarazryvu płasta — technałohii, jakaja dazvalaje pavialičvać addaču śvidravin, a taksama zdabyvać naftu, jakuju ciažka zdabyć — pa-raniejšamu pastaŭlajecca z «niedružalubnych» krain. A pa niekatorych pazicyjach — naprykład, rotarnych kiravanych sistemach, — zaležnaść ad impartu tatalnaja i składaje 100%, padličyli ekśpierty «Jakaŭ i partniory».

Urad RF u stratehii raźvićcia minieralna-syravinnaj bazy da 2050 hoda pryznaŭ, što zaležnaść ad impartnaha abstalavańnia ŭ zdabyčy i raźviedcy karysnych vykapniaŭ zachoŭvajecca. Jana składaje bolš za 90% pa buravym abstalavańni, 50% pa hornych mašynach, 30% — pa naziemnym hieafizičnym abstalavańni, havorycca ŭ dakumiencie.

Kamientary da artykuła