Stała viadoma, u čym abvinavačvajuć byłoha hiendyrektara «Biełłakta» Alaksieja Hrytusieva
Pra toje, što jon pravioŭ u SIZA ŭžo bolš za hod, «Naša Niva» pisała dva miesiacy tamu. Jak vyśvietliłasia, Hrytusievu pahražaje da 12 hadoŭ kałonii.
Alaksiej Hrytusieŭ u 2023 hodzie. Fota ź jahonaha fejsbuka
Alaksieju Hrytusievu 49 hadoŭ. Jon minčuk, advučyŭsia ŭ staličnaj škole №84, a paśla ŭ Biełaruskim dziaržaŭnym ekanamičnym univiersitecie.
Spačatku Hrytusieŭ pracavaŭ na małakazavodzie ŭ Kamiancy, paśla byŭ namieśnikam hienieralnaha dyrektara na «Savuškavym pradukcie». A ŭ 2007-2011 hadach kiravaŭ vaŭkavyskim małočnym pradpryjemstvam «Biełłakt».
Aleksiej Hrytusieŭ u 2011 hodzie
Paśla byŭ dyrektaram Haradskoha abłasnoha inviestycyjnaha ahienstva. Urešcie Hrytusieŭ viarnuŭsia ŭ biznes. Apošni jahony biznes — padmaskoŭnaja kampanija «Optymafud», jakaja pradaje ŭ Rasiju biełaruskuju ježu. Abaroty pastavak praduktaŭ, vykananych im u 2019 hodzie, skłali kala 8 miljonaŭ dalaraŭ.
Pa źviestkach surazmoŭcaŭ «Naša Nivy», jon jašče ŭ listapadzie 2023 staŭ fihurantam «małočnaj spravy» i byŭ źmieščany ŭ SIZA. Tady jaho abvinavačvali ŭ adkatach ad dyleraŭ za pastaŭki tannaj pradukcyi, jak heta było, naprykład, u «cukrovaj spravie», pa jakoj zatrymlivali dyrektaraŭ cukrovych zavodaŭ.
Hrytusieva pačynajuć sudzić 3 sakavika 2025 hoda ŭ sudzie Centralnaha rajona Minska. Jaho vinavaciać pa dvuch artykułach — «padatkovaje machlarstva ŭ asabliva bujnym pamiery» (č. 2 art. 243-2 KK) i «ŭchileńnie ad vypłaty padatkaŭ i zboraŭ u asabliva bujnym pamiery» (č. 3 art. 243 KK). Hrytusievu pahražaje da 12 hadoŭ kałonii sa štrafam i pazbaŭleńniem prava zajmać peŭnyja pasady.