U ZŠA dumajuć, jak zdymać sankcyi z Rasii

Administracyja prezidenta ZŠA Donalda Trampa raspracoŭvaje płan pa źmiakčeńni sankcyjnaha cisku na Rasiju ŭ ramkach namahańniaŭ pa adnaŭleńni dvuchbakovych adnosin. Pra heta paviedamlaje Reuters sa spasyłkaj na nienazvanaha amierykanskaha čynoŭnika i krynicu, znajomuju ź situacyjaj.

Prezident Rasii Uładzimir Pucin i prezident ZŠA Donald Tramp u 2019 hodzie. Fota: Mikhail Svetlov/Getty Images

Pavodle źviestak surazmoŭcaŭ ahienctva, Bieły dom daručyŭ Dziarždepartamientu i Ministerstvu finansaŭ padrychtavać pieralik sankcyjnych abmiežavańniaŭ, jakija mohuć być asłablenyja. Hety śpis budzie abmiarkoŭvacca z rasijskim bokam u najbližejšy čas u ramkach pieramoŭ, nakiravanych na palapšeńnie dypłamatyčnych i ekanamičnych suviaziaŭ pamiž dźviuma dziaržavami.

Jak udakładniaje Reuters, ZŠA razhladajuć mahčymaść admieny sankcyj u dačynieńni da šerahu rasijskich jurydyčnych i fizičnych asob, uklučajučy niekatorych aliharchaŭ. Adnak pakul niezrazumieła, jakija mienavita sastupki Vašynhton moža zapatrabavać ad Maskvy ŭ abmien na hety krok.

Krynicy ahienctva adznačajuć, što Bieły dom daručyŭ raspracavać mahčymyja varyjanty pasłableńnia sankcyjnaha režymu jašče da taho, jak Donald Tramp praciahnuŭ dziejańnie nadzvyčajnaha stanovišča ŭ suviazi ź situacyjaj va Ukrainie. Hety režym nakładaje abmiežavańni na aktyvy i fizičnych asob, jakija majuć dačynieńnie da ahresii Rasii suprać Ukrainy.

Hetyja sankcyi ŭpieršyniu byli ŭviedzienyja administracyjaj Baraka Abamy ŭ sakaviku 2014 hoda paśla anieksii Kryma, a paśla jany niekalki razoŭ pašyralisia, u tym liku padčas pieršaha prezidenctva Trampa.

Ministr finansaŭ ZŠA Skot Biesent u interviju Bloomberg 20 lutaha zajaŭlaŭ, što pierśpiektyvy pasłableńnia sankcyjnaha cisku na Rasiju buduć zaležać ad jaje pazicyi ŭ pieramovach ab spynieńni ahniu va Ukrainie.

Kamientary da artykuła