Prafiesijnym tenisistkam buduć davać apłačany dekretny adpačynak

Žanočaja tenisnaja asacyjacyja (WTA) abjaviła pra stvareńnie fondu padtrymki maciarynstva. Jon zasnavany pry padtrymcy Dziaržaŭnaha inviestycyjnaha fondu Saudaŭskaj Aravii, piša «Trybuna».

Biełaruskaja tenisistka Aryna Sabalenka. Zdymak ilustracyjny. Fota: AP

Fond budzie vypłačvać tenisistkam dapamohu pa ciažarnaści i rodach. Im buduć davać apłačany dekretny adpačynak praciahłaściu da 12 miesiacaŭ, a taksama hranty na lačeńnie biaspłodździa dla stvareńnia siamji i inšyja lhoty.

Tenisistki, jakija majuć prava na ŭdzieł u prahramie, pavinny «mieć dobruju reputacyju ŭ adpaviednaści z praviłami WTA, antydopinhavymi i antykarupcyjnymi prahramami tenisa». Jany majuć padać zajaŭku i časova atrymać śpiecyjalny rejtynh.

Prahrama ciapier dastupnaja dla bolš čym 320 tenisistak. Na ŭdzieł u joj mohuć pretendavać tyja, chto ŭdzielničaŭ u «peŭnaj kolkaści turniraŭ za kankretny pieryjad času» i atrymaŭ śpiecyjalny rejtynh.

Prahrama WTA Maternity Fund źjaŭlajecca častkaj kompleksnaj prahramy WTA Family Focus, raspracavanaj dla taho, kab dać hulcam mahčymaść sumiaščać siamiejnaje žyćcio z prafiesijnym sportam. Jana ŭklučaje śpiecyjalnyja rejtynhi, jakija abaraniajuć rejtynhavuju pazicyju hulca padčas ciažarnaści i paślarodavaha pieryjadu, dazvalajučy im viarnucca na toj ža ŭzrovień na praciahu troch hadoŭ paśla rodaŭ abo na praciahu dvuch hadoŭ paśla inšaha sposabu baćkoŭstva, naprykład, apiakunstva.

Z momantu ŭviadzieńnia śpiecyjalnych rejtynhaŭ paśla viartańnia ź ciažarnaści ŭ 2019 hodzie imi skarystalisia 50 tenisistak.

Kamientary da artykuła