Sabalenka źjaviłasia ŭ adnym z samych darahich rekłamnych rolikaŭ u śviecie
Pieršaja rakietka śvietu ź Biełarusi ź inšymi zorkami sportu źniałasia ŭ rekłamnym roliku, jaki pakazali padčas Supierboŭła.
Kampanija Nike upieršyniu za 27 hadoŭ zamoviła rekłamu na Supierboŭle — finalnym matčy Nacyjanalnaj futbolnaj lihi. Heta hałoŭnaja spartyŭnaja padzieja ŭ ZŠA z darahim rekłamnym časam: chvilinny rolik moža kaštavać kala 16 miljonaŭ dalaraŭ.
U Nike raskazali, što vyrašyli viarnucca na Supierboŭł, kab vykarystać hetuju papularnuju placoŭku dla raspoviedu pra rolu žančyn u sučasnym sporcie, paviedamlaje fastcompany.com.
«Žančyny zaraz prosta bjuć usie rekordy, zapaŭniajuć stadyjony, zabiaśpiečvajuć nievierahodnyja prodažy biletaŭ, zaklučajuć kantrakty, jakich raniej nichto nie bačyŭ, i sutykajucca, mahčyma, z samymi žorstkimi čakańniami adnosna taho, jak im varta siabie pavodzić. I ja dumaju, što jany pieravyznačać, što značyć być spartsmienami i publičnymi asobami budučyni», — raskazała dyrektar pa markietynhu Nike Nikol Chabard Hrem.
U rekłamnym roliku sapraŭdy pradstaŭleny tolki žančyny — zorki suśvietnaha sportu, jakija supracoŭničajuć z kampanijaj. Siarod ich i biełaruskaja tenisistka Aryna Sabalenka. Pieršaja rakietka śvietu źjaŭlajecca ŭ videa dvojčy: u adnym z epizodaŭ jana ŭ adčai kidaje rakietku na kort, a ŭ inšym radujecca pośpiechu.
Aprača Sabalenki, u roliku pad nieŭmiručuju chit Led Zeppelin «Whole Lotta Love» źjaŭlajucca baskietbalistki Kiejtkin Kłark, Ejža Uiłsan, Džudžu Uotkins i Sabryna Ianiesku; futbalistka, dvuchrazovaja ŭładalnica «Załatoha miača» Aleksija Puteljas, zorka biehu na karotkija dystancyi, alimpijskaja čempijonka Šakary Ryčardsan i jašče adna čempijonka Hulniaŭ, himnastka Džordan Čajłz.
Ciapier čytajuć
Palitołah Alina Charysava pahadziłasia supracoŭničać z SBU. Akazałasia, heta było KDB20
Kamientary