Pačaŭ vyviarhacca vielmi niebiaśpiečny vułkan u Hvatemale
U Hvatemale pračnuŭsia vułkan Fueha, jaki siejsmołahi ličać adnym z samych siejśmična aktyŭnych u śviecie, piša Euronews.
Fota: AP Photo/Moises Castillo
Kala 300 siemjaŭ užo evakujavanyja, ale ŭłady papiaredžvajuć, što ŭ zonie ryzyki znachodziacca prykładna 30 000 žycharoŭ: vułkan raźmieščany ŭsiaho za 60 kiłamietrach ad stalicy hetaj centralnaamierykanskaj dziaržavy, jakaja taksama zaviecca Hvatemała.
Vyviaržeńnie pačałosia ŭ noč na paniadziełak. Pra achviary i paciarpiełych infarmacyi pakul nie pastupała.
Ułady rasparadzilisia ab zakryćci škoł i klučavoj aŭtatrasy, jakaja złučaje niekalki nasielenych punktaŭ u najbližejšych rajonach.
Pa słovach siejsmołahaŭ, najbolšuju niebiaśpieku ŭjaŭlaje nie samo vyviaržeńnie vułkana, a łachary — hrazievyja patoki z vady, popiełu, hornych parod i kamianioŭ, jakija ściakajuć sa schiłaŭ i mohuć źniščyć cełyja vioski.
Vyšynia «Čy-hah» — tak vułkan nazyvali plamiony indziejcaŭ, što ŭ pierakładzie ź ichniaj movy «miesca, dzie haryć ahoń» — składaje 3763 mietry nad uzroŭniem mora. Apošni raz jon prajaŭlaŭ značnuju aktyŭnaść dva hady tamu.
Vyviaržeńnie ŭ 2018 hodzie zabrała žyćci 194 čałaviek, jašče 234 źnikli bieź viestak.
Intensiŭnaść vułkaničnych vykidaŭ śpiecyjalisty aceńvajuć pakul jak umieranuju. Ale, čakajecca, što patoki łavy ŭ najbližejšy čas uzmocniacca, paviedamiła miascovaja słužba reahavańnia ŭ nadzvyčajnych situacyjach. Siejsmołahi prahnazujuć, što słupy popiełu buduć dasiahać vyšyni ŭ 7000 mietraŭ. U suviazi z hetym avijaznosiny nad hetym rajonam Hvatemały robiacca z abmiežavańniami.
Čytajcie taksama:
Na Havajach pačaŭ vyviarhacca vułkan Kiłauea — adzin z samych aktyŭnych vułkanaŭ u śviecie
U Hvatemale aŭtobus upaŭ z mosta, zahinuŭ jak minimum 51 čałaviek