«Upieršyniu za 83 hady lehiendarny «Hołas Amieryki» zmušany zmoŭknuć»
Bolš za 1300 supracoŭnikaŭ «Hołasu Amieryki» byli adpraŭlenyja ŭ adpačynak u subotu, a finansavańnie dźviuch amierykanskich navinavych słužbaŭ, jakija viaščajuć dla aŭtarytarnych režymaŭ, było spyniena. Heta adbyłosia na nastupny dzień paśla taho, jak prezident ZŠA Donald Tramp zahadaŭ skaracić dziejnaść maciarynskaj kampanii hetaha dziaržaŭnaha ŚMI i jašče šaści fiederalnych ustanoŭ.
Fota: AP Photo / Andrew Harnik
Dyrektar «Hołasu Amieryki» Majkł Abramavic zajaviŭ, što amal uvieś jaho štat — 1300 žurnalistaŭ, pradziusaraŭ i pamočnikaŭ — byŭ adpraŭleny ŭ administracyjny adpačynak, što paralizavała pracu miedyjaresursu, jaki viadzie viaščańnie amal na 50 movach.
«Ja hłyboka zasmučany tym, što ŭpieršyniu za 83 hady lehiendarny «Hołas Amieryki» zmušany zmoŭknuć», — napisaŭ Abramavic u sacsiektach, adznačyŭšy, što hetaje miedyja adyhryvała važnuju rolu «ŭ baraćbie za svabodu i demakratyju va ŭsim śviecie».
Maciarynskaja struktura VOA — Amierykanskaje ahienctva hłabalnych miedyja (USAGM) — taksama spyniła finansavańnie «Radyjo Svabodnaja Jeŭropa / Radyjo Svaboda», jakoje viaščaje dla krain Uschodniaj Jeŭropy, uklučajučy Rasiju i Ukrainu, a taksama «Radyjo Svabodnaja Azija», što achoplivaje Kitaj i Paŭnočnuju Kareju.
Zahady Trampa mohuć całkam razburyć arhanizacyju, jakaja źjaŭlajecca krynicaj nadziejnych navinaŭ u aŭtarytarnych krainach.
Zasnavany ŭ 1942 hodzie dla supraćdziejańnia nacysckaj prapahandzie, «Hołas Amieryki» ciapier achoplivaje 360 miljonaŭ čałaviek štotydzień. Pavodle apošniaj spravazdačy pierad Kanhresam, u 2024 hodzie Amierykanskaje ahienctva hłabalnych miedyja (USAGM) naličvała kala 3500 supracoŭnikaŭ i mieła biudžet u 886 miljonaŭ dołaraŭ.
Kiraŭnik sieulskaha biuro VOA Uiljam Hała zajaviŭ u niadzielu, što jaho adklučyli ad usich sistem i akaŭntaŭ kampanii.
«Ja tolki chacieŭ pracavać sumlenna i havaryć praŭdu, niezaležna ad taho, pra jakuju ŭładu išła havorka. Kali heta dla kahości pahroza — što ž, niachaj budzie tak», — napisaŭ jon.
Raniej Tramp rasparadziŭsia pravieści maštabnyja skaračeńni ŭ siami fiederalnych ahienctvach. U ich liku — Ahienctva ZŠA pa hłabalnych miedyja (USAGM), jakoje kuryruje «Hołas Amieryki» i «Radyjo Svaboda».
Prezident i hienieralny dyrektar «Radyjo Svaboda» Styvien Kapus tak prakamientavaŭ situacyju: «Iranskija ajatoły, kitajskija kamunistyčnyja lidary i aŭtakraty ŭ Maskvie i Minsku buduć śviatkavać padzieńnie «Radyjo Svaboda» praz 75 hadoŭ. Kali addać pieramohu našym apanientam, heta zrobić ich macniejšymi, a Amieryku słabiejšaj», — havorycca ŭ jahonaj zajavie.
Ministr zamiežnych spraŭ Čechii Jan Lipaŭski nazvaŭ «Radyjo Svabodnaja Jeŭropa» «majakom» dla ludziej, jakija žyvuć pad tatalitarnaj uładaj.
«Ad Biełarusi da Irana, ad Rasii da Afhanistana, RFE i «Hołas Amieryki» źjaŭlajucca adnymi ź niešmatlikich svabodnych krynic dla ludziej, pazbaŭlenych svabody», — napisaŭ jon u X.