U Trampa patłumačyli rašeńnie spynić finansavańnie «Hołasu Amieryki»
Administracyja prezidenta ZŠA Donalda Trampa vyłučyła pieralik pretenzij da viaščalnika «Hołasu Amieryki» i takim čynam «rastłumačyła», čamu vyrašyła spynić jaho finansavańnie.
Bieły dom spyniŭ finansavańnie «Hołasu Amieryki», abvinavaciŭšy viaščalnika ŭ parušeńni žurnalisckich standartaŭ i praduziataści.
15 sakavika Bieły dom pradstaviŭ šerah pretenzij da «Hołasu Amieryki», adznačyŭšy, što niekatoryja reparciory publikavali ŭ svaich prafiesijnych akaŭntach u sacyjalnaj sietcy X kamientary suprać Trampa, niahledziačy na palityku biesstaronnaści. U pryvatnaści, u 2020 hodzie «Hołas Amieryki» pisaŭ pra mahčymuju rolu Rasii ŭ skandale z naŭtbukam Chantera Bajdena, syna byłoha prezidenta Džo Bajdena, što ŭ administracyi Trampa ŭspryniali jak sprobu «schavać praŭdu».
Akramia taho, kiraŭnictva «Hołasu Amieryki» prasiła supracoŭnikaŭ nie nazyvać CHAMAS i jaho členaŭ terarystami, «za vyklučeńniem vypadkaŭ, kali cytujucca aficyjnyja zajavy».
U 2019 hodzie viaščalnik vypuściŭ siužet pra transhiendarnych mihrantaŭ, jakija šukajuć prytułak u ZŠA, robić pieralik Bieły dom parušeńniaŭ svabody słova «Hołasam Amieryki».
Uviečary 15 sakavika stała viadoma, što kala 1300 supracoŭnikaŭ «Hołasu Amieryki» byli adpraŭleny ŭ «administracyjny» adpačynak biez prava dostupu da elektronnaj pošty.
Akramia taho, administracyja Trampa abviaściła pra admienu finansavańnia dla sietki RFE/RL («Radyjo Svabodnaja Jeŭropa / Radyjo Svaboda»). U «Radyjo Svaboda» ŭžo nazvali hetaje rašeńnie «padarunkam voraham Amieryki».
Hetyja zachady vyklikali šyrokuju krytyku z boku abaroncaŭ svabody presy. Arhanizacyja «Reparciory bieź miežaŭ» zajaviła, što hetaje rašeńnie pahražaje svabodzie presy va ŭsim śviecie i anuluje 80-hadovuju historyju padtrymki svabodnaha raspaŭsiudu infarmacyi z boku ZŠA.
U zajavie Biełaha doma adznačajecca, što hetyja zachady «harantujuć, što padatkapłacielščyki bolš nie buduć finansavać radykalnuju prapahandu».