Litoŭskija elity ličać hałoŭnym vyklikam dla krainy pahrozy z boku Biełarusi i Rasii
U pradstaŭnikoŭ litoŭskich elit spytali ab pahrozach i vyklikach dla krainy. Jany źviazany z režymami ŭ Biełarusi i Rasii.
Litoŭskija elity ličać hałoŭnaj pahrozaj dla krainy ŭ najbližejšyja piać hadoŭ pahrozy z boku Rasii i Biełarusi. Pavodle danych apytańnia, jakoje pravioŭ partał Delfi, hałoŭnym vyklikam pahrozu z boku Rasii i Biełarusi nazvali 257 pradstaŭnikoŭ litoŭskaj elity.
Na druhim miescy, pavodle mierkavańnia 226 respandentaŭ apytańnia, znachodzicca ŭzrastajučaja niestabilnaść u śviecie i ŭzmocnienaje pačućcio nieabaronienaści. 209 respandentaŭ važnym vyklikam taksama nazvali demahrafičnuju jamu i nizkuju naradžalnaść.
Akramia taho, udzielnikaŭ apytańnia paprasili acanić, jakimi buduć nastupnyja piać hadoŭ dla Litvy. Bolšaść — 761 — pradstaŭnikoŭ elity prahnazujuć, što sucelnaha prahresu ŭ krainie nie budzie. 189 respandentaŭ ličyli, što Litvu čakaje vialiki prahres, a 6 zajavili, što kraina sutykniecca z rehresam.
Apytańnie mierkavańnia litoŭskaj elity z 27 śniežnia minułaha hoda pa 27 studzienia hetaha hoda pa zakazu Delfi pravioŭ časopis Reitingai. Było apytana 1 142 čałavieki: palityki, pradstaŭniki biźniesu, ekanamisty, dziaržaŭnyja słužačyja, kiraŭniki i pradstaŭniki ŚMI, hramadskija dziejačy, a taksama dziejačy pop-kultury, mody i internetu.
Pavodle mierkavańnia palitołaha, kiraŭnika vilenskaha ofisa Freedom House Vicisa Jurkonisa ŭ litoŭskich elit niama viery ŭ toje, što režymy ŭ Biełarusi i Rasii źmieniacca.
«Mnie zdajecca, što susiedstva Rasii i Biełarusi — heta abjektyŭnaja realnaść. Pakul isnujuć aŭtarytarnyja režymy, hetyja krainy zaŭsiody buduć krynicami peŭnaj tryvohi i pahrozy. Vyniki hetaha apytańnia zrazumiełyja i nie pavinny vyklikać ździŭleńnia. Adzinaje pytańnie, jakoje zastajecca — jak my možam na heta reahavać.
Častka hramadstva i palitykaŭ stracili vieru ŭ toje, što hetyja krainy (Rasija i Biełaruś) mohuć źmianicca», — adznačyŭ Jurkonis.