Žychary prymiežnaj polskaj vioski vystupili suprać vyški dla nazirańnia za Biełaruśsiu
Amal usie žychary polskaj vioski Chamantoŭcy (heta za 150 mietraŭ ad miažy ź Biełaruśsiu) padpisali list suprać budaŭnictva naziralnaj vyški pobač sa svaimi damami. Ab kanflikcie piša Most sa spasyłkaju na telekanał TVP3 Białystok.
Vioska Chamantoŭcy (Chomontowce). Fota: KQH / Wikimedia Commons
Pahraničniki płanujuć raźmiaścić u Chamantoŭcach 70-mietrovuju vyšku, kab pry dapamozie aptyčnych i elektronnych ustrojstvaŭ nazirać za prylehłaj terytoryjaj Biełarusi.
Miascovyja žychary takim rašeńniem niezadavoleny. Jany chočuć, kab pamiežnaja słužba vybrała dla vyški miesca dalej ad viaskovych damoŭ.
— My šukali cišyni i spakoju, ale heta [budaŭnictva vyški] usio nam razburaje, — skazała žycharka vioski, pobač z domam jakoj pavinna źjavicca vyška.
Padpałkoŭnik Andžej Juźviak z Pahransłužby paviedamiŭ telekanału, što viedamstva staranna padyšło da vybaru miescaŭ dla budaŭnictva vyšak.
— Vybaru hetych miescaŭ papiaredničaŭ udumlivy analiz, pry jakim prymalisia da ŭvahi asablivaści reljefu, pravavy status nieruchomaści, patencyjnaje pole nazirańnia i ŭzajemnaje raźmiaščeńnie vyšak, kab maksimalna pakryć terytoryju vizualnym nazirańniem, — napisaŭ padpałkoŭnik.
Pavodle jaho słoŭ, vyški nie buduć upłyvać na navakolnaje asiarodździe. Na ich płanujecca ŭstanavić tolki kamiery nazirańnia, a taksama čyrvonyja ahni śvietłavoj aharodžy dla praduchileńnia sutyknieńnia ź latalnymi aparatami.
Usiaho ŭ rajonie polska-biełaruskaj miažy źbirajucca ŭstalavać piać takich vyšak.