ZŠA terminova raspracoŭvajuć sistemu «Załaty kupał» suprać dalnabojnych rakiet

Pientahon raspracoŭvaje novuju abarončuju sistemu «Załaty kupał», jakaja pavinna abaranić ZŠA ad rakietnych pahroz vialikaj dalokaści. Administracyja Trampa nie škaduje srodkaŭ dla realizacyi prajekta, paviedamlaje CNN.

Prezident ZŠA Donald Tramp. Fota: Joe Raedle / Getty Images

Amierykanskija vajskovyja čynoŭniki ŭ terminovym paradku pracujuć nad novaj abarončaj sistemaj pad nazvaj «Załaty kupał», jakaja zaklikanaja abaranić ZŠA ad rakietnych udaraŭ vialikaj dalokaści. Bieły dom nie budzie škadavać srodkaŭ dla hetaha prajekta, jaki staŭ adnym z hałoŭnych pryjarytetaŭ Pientahona pry prezidenctvie Donalda Trampa, paviedamlajuć krynicy CNN, znajomyja ź situacyjaj.

«Załaty kupał» źjaŭlajecca sprobaj administracyi Trampa ŭkaranić kancepcyju supraćrakietnaj abarony, padobnuju da izrailskaj sistemy. Adnak, u adroźnieńnie ad apošniaj, jakaja abaraniaje ad rakiet małoj dalokaści, «Załaty kupał» maje na mecie zabiaśpiečyć abaronu ad balistyčnych i hipierhukavych rakiet, zdolnych nanieści škodu na ŭzroŭni krainy.

Niahledziačy na toje, što prajekt znachodzicca na stadyi kanceptualnaha abmierkavańnia, administracyja Trampa ŭžo daručyła vajskovym čynoŭnikam zabiaśpiečyć adlustravańnie finansavańnia ŭ biudžetnych acenkach na 2026-2030 hady.

Sistema, jak zajaŭlajuć ekśpierty, moža kaštavać miljardy dalaraŭ na raspracoŭku, budaŭnictva i absłuhoŭvańnie. Izrailski kompleks abaraniaje tolki abmiežavanuju terytoryju, a Tramp płanuje razharnuć sistemu, zdolnuju abaranić usiu terytoryju ZŠA.

Pientahon, jak adznačajuć krynicy CNN, ciapier pracuje nad technałohijaj, jakaja dazvolić realizavać hetuju metu, choć pakul sistema zastajecca tolki kanceptam. Ciapier Pientahon karektuje biudžet Ministerstva abarony na 2026 hod, kab uličyć pryjarytety, vykładzienyja Trampam. Adnak dakładnyja sumy finansavańnia na hety prajekt zastajucca niavyznačanymi.

Kamientary da artykuła