Pieramovy pra «padzieł terytoryj» i spynieńnie bajavych dziejańniaŭ va Ukrainie viaducca «prosta ciapier», zajaviŭ prezident ZŠA Donald Tramp u hutarcy z žurnalistami ŭ Biełym domie.
«Ja dumaju, što ŭžo zusim chutka my zmožam damahčysia poŭnaha spynieńnia ahniu, a zatym i zaklučyć pahadnieńnie. Hetyja pytańni abmiarkoŭvajucca prosta ciapier — havorka idzie pra padzieł ziamli i pra inšyja aśpiekty», — adznačyŭ Tramp.
Ciapier, ź jahonych słoŭ, na asobnych učastkach frontu ŭžo dasiahnutaje pieramirje, jakoje «dobra vykonvajecca».
Taksama amierykanski prezident padkreśliŭ, što asnovy dla budučaha mirnaha pahadnieńnia byli zakładzienyja ŭ chodzie jaho kantaktaŭ z prezidentami Ukrainy i Rasii — Uładzimiram Zialenskim i Uładzimiram Pucinym.
«Ja vielmi dobra pahutaryŭ z abodvuma i liču, što ŭ nas užo sfarmavanyja ramki budučaha pahadnieńnia», — zajaviŭ Tramp.
Pry hetym jon dadaŭ, što jaho imknieńnie zaviaršyć kanflikt pradyktavana dźviuma klučavymi pryčynami: pa-pieršaje, z-za hibieli «tysiač maładych ludziej», a pa-druhoje, z-za kałasalnych vydatkaŭ ZŠA, jakija, pa jaho słovach, užo dasiahnuli 350 miljardaŭ dalaraŭ.
Na pytańnie, ci płanujuć ZŠA ŭvieści bolš sankcyj suprać Rasii praz pastajannyja ataki na ŭkrainskuju infrastrukturu, Tramp adkazaŭ, što raźličvaje na pahadnieńnie ab spynieńni ahniu.
Taksama Tramp znoŭ paŭtaryŭ raniejšy tezis pra ŭkrainskich sałdat nibyta «ŭ akružeńni» na Kurščynie, choć, pavodle acenak amierykanskaj i jeŭrapiejskaj raźviedak, ukrainskija vojski sutyknulisia ź intensiŭnym ciskam z boku rasijskich sił, ale ŭsio ž u poŭnym akružeńni nie znachodziacca.
Akramia taho, prezident ZŠA jaki ŭžo raz viarnuŭsia da pytańnia dałučeńnia da ZŠA Kanady, padkreśliŭšy, što nie žartuje:
«Kali ja kažu, što Kanada pavinna być našym štatam, ja sapraŭdy heta maju na ŭvazie».
Zialenski anansavaŭ sustreču ŭkrainskich i amierykanskich dypłamataŭ
Tramp nacisnuŭ čyrvonuju knopku ŭ siabie na stale. I patłumačyŭ, navošta heta zrabiŭ
Zialenski: Z Trampam abmiarkoŭvali pieradaču ZŠA Zaparožskaj AES
Zialenski paprasiŭ u Trampa bolš Patriot, i toj abiacaŭ pašukać
Stali viadomyja novyja detali pieramoŭ Trampa i Zialenskaha
Ciapier čytajuć
«Vajna ŭsio śpiša». Biełaruskim udzielnikam hiej-prajda ŭ Vilni pahražali raspravaj ad imia biełaruskich vajaroŭ za vykarystańnie bieła-čyrvona-biełaha ściaha155
Kamientary